"Görüşə psixoloji olaraq nə qədər nikbin yanaşılsa da, öncədən də avstriyalıların üstün oyun sərgiləyəcəyi bilinirdi. Belə qarşılaşmalar hakimlər briqadası üçün çətinlik yaratmır. Referi Polşa futboluna xas olaraq ikili mübarizələrə, futbolçulara sona kimi oynamağa imkan yaradırdı. Bəzi epizodlarda hər iki tərəfin lehinə, nəticəyə təsir etməyən səhvlərə yol verildi. Sarı vərəqələrdən aşırı dərəcədə çox istifadə edilirdi. Almeydanın rəqibə qarşı qayda pozuntusu sıradan epizod idi və rəsmi xəbərdarlığa ehtiyac duyulmamalı idi. Bu halda sarı vərəqə göstərilirsə, Elvin Cəfərquliyevə qarşı rəqibin hərəkəti, açıq kobudluğu, tutub saxlaması baş hakim tərəfindən bağışlandı. Avstriyalıların dördüncü qoluna kimi matçda nisbi gərginlik hiss olunur, əsasən də rəqib futbolçuların komanda şəklində pressinqi referini daha diqqətli olmağa sövq edirdi. Azərbaycanlı futbolçular açıq-aşkar oyun tempindən geri qalır, sürətdə çatdıra bilmirdilər. Belə vəziyyət tez-tez qayda pozuntularına gətirib çıxarır, baş hakimin müdaxiləsini şərtləndirirdi. Oyunun sonları daha rahat məcrada davam etdi, hər iki komanda matçın tez bitməsini gözləyirdi. Hesab və komandaların finişə doğru nisbi passivliyi, oyunun uzatma dəqiqələrini də korrektə etdi. Çoxsaylı əvəzetmələrə, həkim müdaxilələrinə baxmayaraq, baş hakim şablonluğa yol verməyərək oyunu çox da uzatmadı. Buna ehtiyac da yox idi. Ümumilikdə hakimlər briqadası işlərinin öhdəsindən gələrək hansısa komandanın narazılığı ilə üzləşmədilər".