Almaniya futbolu yeni eşq xəbəri ilə çalxalanır.

Özü də bu xəbər elə-belə şəxs yox, ''Bavariya''nın baş məşqçisi Yulian Naqelsmann ilə bağlıdı.

Almaniyanın ən populyar və ən çox oxunan nəşri olan ''Bild'' çərşənbə günü Naqelsmannı bahalı bir yaxtada bir xanımla qucaqlaşarkən və öpüşərkən yaxaladı. Şəkillər Naqelsmannın İbitsa adasındakı istirahəti zamanı çəkilmişdi. Yaxtanın kimə məxsus olduğu bilinməsə də, xanımın kimliyi çox tez üzə çıxdı. Məlum oldu ki, bu, ''Bild''in öz əməkdaşı Lena Vürtsenbergerdi! 30 yaşlı bu xanım uzun müddətdi reportyor kimi çalışır. O, daha öncə ''Bild''də ''Verder'' yazarı kimi fəaliyyət göstərirdisə, son iki ildə Münhenə köçərək ''Bavariya'' haqda yazılar dərc edirdi. Elə ən son münhenlilərin yeni transferi Sadio Manedən ''Bild'' üçün müsahibəni məhz Vürtsenberger götürmüşdü. Düzdü, 35 yaşlı Nagelsmann hazırda subaydı. O, son 15 ildə birlikdə olduğu və 4 il öncə ailə həyatı qurduğu Verena adlı xanımdan iyunun 3-də ayrılmışdı. Maraqlıdı ki, bu xəbəri də ictimaiyyətə məhz ''Bild'' çatdırmışdı. Gənc mütəxəssisin bu xanımdan bir oğlu və bir qızı var. Amma istənilən halda bu hadisə Almaniya futbol ictimaiyyətində geniş əks-səda doğurdu. ''Bild'' məsələ ilə bağlı bəyanat yaymalı oldu. Həmin bəyanatda qeyd olundu ki, nəşrin rəhbərliyi əməkdaşının ''Bavariya''nın baş məşqçisi ilə yaxın münasibətdə olmasından xəbərdar deyilmiş. Müxtəlif söz-söhbətlərin qarşısını kəsmək üçün Lena Vürtsenberger qəzetin ''Bavariya'' yazarlığından kənarlaşdırılıb. Yəni bu xanım artıq Münhen nəhəngi barədə yazmayacaq. Deyilənə görə, Vürtsenberger ''Bavariya''lı oyunçular arasında çox tanınırdı və onlardan tez-tez müsahibə götürürdü.

Bu üzdən Naqelsmann ictimaiyyətin bu münasibətdən xəbərdar olmasını istəmirdi. Amma eyni zamanda o da bildirilir ki, Naqelsmann bu münasibətin ciddiliyinə inanır və ən əsası o, ''Bavariya'' rəhbərliyini də bundan xəbərdar edibmiş.