A seriyasında 26-cı tura bazar ertəsi keçirilən bir oyunla yekun vuruldu.

"Football-plus.az" xəbər verir ki, martın 13-də Milanda baş tutan matçda qalib müəyyənləşmədi. Eyniadlı komandanın öz meydanında B seriyasına qayıtmamaq üçün çarpışan “Salernitana”ya qalib gələ bilməməsi (1:1) bir qədər gözlənilməz oldu. Amma “Milan”la bağlı digər fakt diqqəti daha çox cəlb etdi.

“Milan”ın belə start heyəti olmamışdı...

İtaliyanın son çempionu ilin ilk ayı ilə müqayisədə fevralda çox yaxşı nəticələr əldə etsə də, vəziyyət yenidən pisləşib. 25-ci turun martın 4-də baş tutan səfər oyununda “Fiorentina”ya uduzan (1:2) Stefano Pyolinin komandası autsayderdən evdə yalnız bir xal ala bildi. Nəticədə indi ölkə çempionatında 4-cü yerdə olan “Milan” lider “Napoli”dən nə az, nə çox – düz 20 xal geri düşdü.

İndi müzakirəyə yol açan əsas faktı nəzərinizə çatdıraq. Pyoli “Salernitana”ya qarşı oyuna sırf legionerlərlə başlamağı lazım bilib. Onlardan fransalı hücumçu Olivye Jirunun fasilə ərəfəsində vurduğu qol komandanın qələbəsi üçün kifayət etməyib. “Opta” statistika şirkətinin məlumatına əsasən, “Milan”ın start heyətində A seriyasında qələbəyə görə 3 xal sisteminin tətbiq olunduğu 1994/95 mövsümündən indiyədək ilk dəfə yerli oyunçu görünməyib. “La Gazzetta dello Sport” və “La Repubblica” qəzetləri, həmçinin “Sky Sport Italia” telekanılı belə halın ölkə nəhənginin azı A seriyasında çıxış etdiyi illərdə ilk dəfə qeydə alındığını da dəqiqləşdirib. “Qırmızı-qaralar”ın tarixinə düşən faktın detallarına nəzər salaq.

* Start heyətində birdən-birə 9 ölkədən olan futbolçuya təsadüf edilib (onlardan ikisinin ikili vətəndaşlığı var). İlk dəqiqələrdən daha çox oyunçu ilə təmsil olunan ölkə Fransadı. Belə desək, bu ölkənin startdakı payı 4,5-ə bərabər olub. Məsələ ondadı ki, Jiruya məhsuldar ötürmə verən yarımmüdafiəçi İsmael Bennaser Fransada doğulsa da, Əlcəzair yığmasının şərəfini qoruyur. Jiru, Mayk Menyan, Teo Ernandes, Pyer Kalulu isə fransalıdılar. Maraqlıdı ki, bir müddət əvvəl “Real” meydana ispaniyalı futbolçularsız çıxarkən madridlilərin heyətində məhz fransalılar üstünlük təşkil etmişdilər.
* “Milan”ın ilk “11-liy”ində digər ölkələr hərəyə bir oyunçu ilə təmsil olunublar. Rafael Leao Portuqaliya, Braim Dias İspaniya, Aleksis Salemakers Belçika, Rade Kruniç Bosniya və Hersoqovina, Fikayo Tomori İngiltərənin təmsilçisidi. Almaniyada dünyaya gələn Malik Tiav isə ana tərəfdən Finlandiya pasportunu da daşıyır.
* Pyoli bir saatlıq mübarizə arxada qalandan sonra Zlatan İbrahimoviç (İsveç), Şarl De Ketelare və Divok Orici (hər ikisi Belçika) kimi legionerləri mübarizəyə qoşub.
* “Salernitana” ilə oyunda lombardiyalıların heyətində görünən ilk italiyalı futbolçu Alessandro Florentsi olub. 32 yaşlı müdafiəçi 77-ci dəqiqədə Salemakersi əvəzləyib. 85-ci dəqiqədə isə Bennaserin yerinə Sandro Tonali meydana çıxıb. Maraq üçün rəqibin start heyətində yalnız 3 italiyalının oynadığını da bildirək.
* Ümumiyyətlə, bu mövsüm “Milan”ın iştirak ərizəsinə adı yazılan və meydana çıxmaq şansı olan digər italiyalı futbolçular bunlardı: Antonio Mirante (A seriyasında bu mövsüm oynamayıb), Davide Kalabriya (14 oyun), Matteo Qabbya (11) və Tommazo Pobeqa (13).

Mançini narahatdı

Roberto Mançini “Milan”la bağlı fakta görə narahatlığını dilə gətirməli olub. İtaliya yığmasının baş məşqçisini anlamaq çətin deyil. Hər halda ölkənin aparıcı klublarından birinin start heyətində yerli futbolçunun görünməməsi ilk növbədə onun işini çətinə salır: “Bu problem artıq bir müddətdi mövcudluğunu davam etdirir. Şikayətlənməyin mənası yoxdu, vəziyyətdən çıxış yolu tapılmalıdı. Aydın məsələdi ki, belə vəziyyət məni məyus edir. Ona görə ki, komandalarımızda yaxşı yerli oyunçuların sayı kifayət qədərdi. Amma hər klub və məşqçi öz seçimini etməkdə sərbəstdi”.

A seriyasında 28-ci fakt

Amma “Milan” çempionat matçına yalnız legionerlərlə başlayan ilk komanda deyil. A seriyasında bu planda bazar ertəsi 28-ci fakt qeydə alındı. Bu seriyada ilkə imza atan klub “İnter” olub. Sözün düzü, “Milan”ın əzəli rəqibindən bunun gözləmək olardı. “Qara-göylər”in sabiq çalışdırıcısı Joze Mourinyo 2008-ci il oktyabrın 19-da paytaxtda “Roma” üzərində 4:0 hesablı qələbəyə sırf legionerlərin mükəmməl oyunu sayəsində sevinib. Portuqaliyalı mütəxəssisin hazırkı komandasına qarşı matçın ikinci hissəsində mübarizəyə 3 əcnəbi oyunçunu qoşduğunu da vurğulayaq. Maraq üçün onu da yada salaq ki, “Milan”ın hücumçusu İbrahimoviç onda romalıların qapısına iki dəfə yol tapmışdı.

Bu fakt da maraqlıdı. İndi legionerlərə daha çox şans verilməsinə görə narahatlıq keçirən Mançini özü 2015-ci ildə Pyoli kimi addım atıb. O, “İnter”in “Palermo” ilə oyununa (1:1) yadellilərlə başlayıb.
Ancaq bu planda rekordçu “İnter” deyil. Milanlılar oyunlara 8 dəfə legionerlərlə başlayıbsa, “Udineze”də belə hal 9 dəfə baş verib. “Roma” 3, “Napoli” və “Fiorentina” 2, “Bolonya”, “Torino” və “Spetsiya” isə 1 dəfə ilk dəqiqələrdən “əcnəbi qiyafəsinə bürünüb”. “Milan” kimi “Torino” və “Spetsiya”nın bu siyahıya cari mövsümdə qoşulduğunu da bildirək.

115 il əvvəli xatırlayarkən...

Bu yerdə istər-istəməz 115 il əvvəli xatırlamalı olursan. “Milan”ın əsası 1899-cu ildə qoyulub. “İnter” isə 1908-ci ilin martında yaradılıb. Onda “Milan” rəhbərliyi əcnəbilərin xidmətindən imtina etmək və yola yalnız yerli oyunçularla davam etmək qərarına gəlmişdi. Bosların yeni siyasətindən narazı olan legionerlərlə italyanlardan ibarət 44 nəfərlik qrup martın 9-da yeni klub yaratmağı lazım bilmişdi. Kluba məhz “Milan”ı daim qıcıqlandırsın deyə “beynəlmiləl” mənasını verən “İnternatsionale” (klubun tam adı belədi) adı verilmişdi.
Bu hadisədən 115 il ötəndən sonra “İnter” sonuncu turun “Spetsiya” ilə matçına 5 italiyalı oyunçu ilə başlayır, “Milan”ın start heyətində isə yerli futbolçu görünmür!..