“Neqreyra işi”nə görə saksiyalar təhlükəsi ilə üzləşən “Barselona” daha bir bəd xəbər alıb.

"Football-plus.az"ın məlumatına görə, Kataloniya məhkəməsi klubun yarımmüdafiəçi Qavi ilə bağladığı yeni müqavilənin qeydiyyatının ləğvi haqda qərar çıxarıb.

Yerli mənbələrin xəbərinə görə, qərar klubun məhkəməyə verilən müddətdən bir gün gec müraciət etməsi və “maliyyə feyr-pleyi” qaydasını pozması ilə bağlı olub.

Beləliklə, 18 yaşlı ispaniyalı futbolçu yenidən “Barselona”nın gənclərdən ibarət komandasının oyunçusu kimi qeydiyyatda olacaq.

Xatırladaq ki, ötən ilin sentyabrında Qavi ilə müqavilənin müddətinin 2026-cı ilin yayına qədər uzadıldığı açıqlanmışdı. Yeni müqavilə əsasən, onun maaşının artırılması nəzərdə tutmuşdu. Dekabrda rəhbərliyin “şişirdilmiş” maaş səbəbindən Qavini əsas komandaya daxil edə bilmədiyi məlum olmuşdu. Bu ilin yanvarında La Liqa rəhbərliyi “Barselona”ya futbolçunu hələ də əsas komandanın oyunçusu kimi qeydiyyatdan keçirə bilməyəcəyi ilə bağlı xəbərdarlıq etmişdi. Səbəb kimi yeni müqavilənin iqtisadi tələblərə cavab vermədiyi göstərilmişdi.

Daha sonra məhkəmə “Barselona”ya Qavinin yeni sözləşməsini qeydiyyatdan keçirməyə icazə vermişdi, amma La Liqa bu qərardan apellyasiya şikayəti vermişdi.