“Bavariya” üç həftə əvvəl Parisdə qazandığı qələbədən sonra, təbii ki, cavab görüşü ərəfəsində bu duelin favoriti sayılırdı.

“Football-plus.az” xəbər verir ki, əlbəttə, heç kim PSJ-ni hesabdan silmirdi. Mbappe və Messi əla forma yığıb, belə yüksək səviyyəli ifaçılar isə istənilən rəqiblə duelin taleyini həll edə bilər. Gözlənildiyi kimi, Qaltyenin komandası ev oyunu ilə müqayisədə daha cəsarətli oyun planı seçmişdi. Topa daha çox nəzarət edən qonaqlar ilk yarının gedişində hesabı açmaq üçün iki gözəl şans yaxaladı. Ancaq əvvəlcə Messi yaxın məsafədən keyfiyyətli zərbə vura, ardından Vitinya topu boş qapıdan keçirə bilmədi. Daha dəqiqi, Zommer təzyiq altında topu itirdi, Vitinyanın zərbəsindən sonra isə De Liqt “sürüşmə” fəndi ilə topun qapı xəttini keçməsinə imkan vermədi.

Fasiləyə qədər hücumda heç nə edə bilməyən meydan sahibləri 2-ci hissədə fəallaşdı və oyunun axarını dəyişməyi bacardı. 61-ci dəqiqədə Verrattinin kobud səhvi hesabın açılmasına səbəb oldu. Onun cərimə meydançası önündəki səhvindən sonra Qoretska topu Çupo-Motinqə ötürdü, kamerunlu hücumçu yaxın məsafədən zərbə ilə Donnarummanı məyus etdi. PSJ-nin vəziyyəti bir qədər də çətinləşsə də, hər halda, məğlubiyyətdən qaçmaq üçün yetərincə vaxt var idi. Ancaq parislilər oyunun axarını dəyişməyi bacarmadılar. Onlar yalnız standart vəziyyətlər zamanı təhlükə yarada bilirdilər. Ramosun bir zərbəsindən sonra Zommer komandasını real qoldan xilas etdi, digər zərbəsində isə azacıq dəqiqlik çatmadı. Əvəzində sona yaxın rəqibi əks-hücumda tutan münhenlilər Qnabrinin dəqiq zərbəsi sayəsində qalibin kimliyinə tam aydınlıq gətirdilər. PSJ növbəti dəfə ÇL-də fiasko ilə üzləşdi. Çox güman, mövsüm bitəndən sonra Qaltye qovulacaq, klub rəhbərliyi çempionluqla kifayətlənən deyil. “Bavariya” bu dueldə daha güclü idi və 1/4 finala adlaması ədalətlidi.

Faktlar
* Messi ÇL-də start heyətində göründüyü oyun sayına (150) görə üçüncüdü. Argentinalı yalnız Kriştiano Ronaldo (178) ilə Kasilyasdan (176) geri qalır. Yeri gəlmişkən, Messinin komandaları 2015-dən bəri finala vəsiqə qazana bilmir. Sonuncu dəfə məhz həmin il onun heyətində olduğu “Barselona” “Yuventus”u məğlub etməklə (3:1) bu turnirin qalibi olub.
* PSJ 2023-də 6-cı məğlubiyyətlə barışdı. Bu il 15-ci oyununu keçirən parislilər “Lans” (1:3), “Renn” (0:1) və “Monako” (1:3) ilə çempionat, “Marsel”lə kubok (1:2) oyunlarında, eləcə də “Bavariya” ilə iki ÇL qarşılaşmasında uduzub. Halbuki komanda il dəyişənə qədər 2022/23 mövsümündə məğlubiyyət tanımırdı.
* PSJ tarixində ilk dəfə ÇL mövsümündə keçirdiyi bütün oyunlarda qol buraxdı. Parislilər turnirdə keçirdiyi 8 oyunun heç birində qapısını toxunulmaz saxlaya bilmədi. PSJ həmçinin şeyxlərin himayəsinə keçəndən bəri ilk dəfə ÇL-in pley-offunu qol vurmadan tərk etdi. Xatırladaq ki, hazırda klubun sahibi Nasser Əl-Xelayfinin sədri olduğu “Qatar Sports Investments” fondudu. Qətər fondu klubun səhmlərinə nəzarət paketinə 2011-ci ildə yiyələnib.
* ÇL-də 137 oyun keçirən PSJ bu turniri bir dəfə də qazana bilməyib. Yalnız “Arsenal” parislilərdən daha çox oyun (177) keçirməklə eyni uğursuzluğu yaşayıb.
* “Bavariya” tarixində 21-ci dəfə ÇL-də 1/4 finala adladı ki, istənilən başqa komanda bu nəticəyə həsəd aparır. Almaniya nəhəngi həmçinin bu turnirdəki son 4 oyunu “quru” keçirib ki, bu da klub rekordunun təkrarlanmasıdı.