“Vilyarreal” bu mərhələdə “Bavariya” ila müqayisədə autsayder sayılsa da, 1/8 finaldakı uğuru “sarılar”a bir qədər hörmətlə yanaşmanı vacib etmişdi.

Əvvəlki mərhələdə “Yuventus”u İtaliyada böyük hesabla (3:0) məğlub edən Emerinin komandası ötən həftə münhenliləri minimal hesabla üstələmişdi. Doğrudu, “Bavariya” üçün evdə bu məğlubiyyətin əvəzini artıqlamasıyla çıxmaq çox da çətin vəzifə kimi görünməyə bilərdi. Almaniya nəhəngi ÇL-də buna dəfələrlə nail olmuşdu. Amma Naqelsmannın komandasının “sarılar”ın intizamlı müdafiəsini nə dərəcədə və neçə dəfə yara biləcəyini yalnız cavab görüşü göstərəcəkdi.

Avropa Liqasının son qalibi, gözlənildiyi kimi, Münhendə əsas diqqəti ilk oyundakı kiçik üstünlüyünü qorumağa, qapısını yenə toxunulmaz saxlamağa çalışdı. La Liqada son həftələr zəif nəticələr göstərən “Vilyarreal”ın “Bavariya”nın hücumlarının qarşısını hansı dəqiqəyə qədər alacağı maraq doğururdu. Naqelsmann meydana hücumameyilli heyət buraxsa da, onun komandasının həmlələri, demək olar ki, real qol vəziyyətləri ilə nəticələnmirdi. Meydan sahibləri istəyinə yalnız ikinci hissənin əvvəlində çatdılar: Levandovski Müllerin ötürməsi ilə hesabı açdı. Bu, Emerinin komandasının oyun planlarına böyük zərbə sayıla bilərdi. Qoldan az sonra münhenlilər fərqi artırmaq üçün daha bir imkan yaxaladılar. Ancaq Müller şansdan yararlana bilmədi. Qonaq komanda isə oyun intizamını pozmur və iki matçın ümumi nəticəsinə əsasən yaranan heç-heçə vəziyyətini qorumağa çalışırdı. “Vilyarreal” eyni zamanda növbəti qolu gətirəcək şansını da gözləyirdi. Bu planda Emerinin əvəzləməsi həlledici rol oynadı. 84-cü dəqiqədə Koklenin yerinə meydana çıxan Çukvueze az sonra Jerar Morenonun ötürməsi ilə cavab qolunu vurdu. Həmin epizodda meydana yenicə çıxan Devisin əvvəlcə ofsaydı pozması, sonra isə Çukvuezenin qarşısını ala bilməməsi ev sahiblərini şok vəziyyətinə saldı. Münhenlilər sona qədər rəqibi təzyiq altında saxlasalar da, hakimin final fiti mövsümün növbəti sürprizini, daha doğrusu, sensasiyasını rəsmiləşdirdi!

Faktlar
* “Bavariya” ardıcıl ikinci mövsüm ÇL-də mübarizəni 1/4 finalda dayandırdı. Almaniya klubu bir il əvvəl bu mərhələdə PSJ-yə rəqib meydanında daha az qol vurduğuna (2:3, 1:0) görə məğlub olmuşdu.

* Oyun ərzində “Bavariya”nın qapısına yönələn yeganə zərbə qolla nəticələndi. “Vilyarreal”ın rəqib qapısına endirdiyi 4 zərbədən 3-ü hədəfə düşməsə də, yeganə dəqiq zərbə mərhələni adlamaq üçün kifayət etdi. Münhenlilərin qapı istiqamətində vurduğu 24 zərbədən 4-ü dəqiq alındı. Maraqlıdı ki, ilk görüşdə “Vilyarreal”ın “çərçivə”yə düşən yeganə zərbəsi minimal hesabla qalib gəlməsinə səbəb olmuşdu.

* “Vilyarreal” ikinci dəfə ÇL-in yarımfinalına vəsiqə qazandı. İspaniya klubu ilk dəfə 2005/06 mövsümündə ən güclü 4 komanda sırasına düşmüşdü. “Sarılar” onda “Arsenal” səddini keçə bilməmişdilər (0:1, 0:0).

* “Vilyarreal” bütün turnirlərdə keçirdiyi son 6 oyunda 2 qələbə qazanıb. Emerinin komandası məhz ÇL-də “Yuventus”a (3:0) və “Bavariya”ya (1:0) üstün gəlib. La Liqada baş tutan son 3 matçda hesabına yalnız 1 xal yaza bilən “Vilyarreal” hazırda 7-ci yeri tutur.

* Levandovski ÇL-in cari mövsümünü 13 qolla hələ ki bombardirlərin siyahısında lider mövqeyində başa vurdu.