Premyer-liqanın 26-cı turunun "Turan Tovuz" - "Qəbələ" (1:1) matçından sonra Azərbaycan millsinin baş məşqçisi Canni de Byazi jurnalistlərə müsahibə verdi.

"Football-plus.az" xəbər verir ki, italiyalı mütəxəssis media nümayəndələri ilə söhbətdə bəzi maraqlı məqamlara toxundu.

- Görüş haqda fikirlərinizi bilmək maraqlı olardı...

- Bu gün çox gözəl oyun oldu. Son saniyəyə kimi meydanda mübarizə gedirdi. Dünən Gəncədə də maraqlı matç izlədik. "Kəpəz"in daha çox qol imkanları oldu, çox yaxşı oynadılar. Qələbə qazana da bilərdilər. İzlədiyim hər iki görüş balanslı şəkildə keçdi.

- Bölgələrdə olan ab-hava haqda nə deyə bilərsiz?

- Çox gözəl idi. Dünən Gəncədə oyun həftəiçi idi. Düşünürəm ki, şənbə-bazar günləri matçlara daha çox azarkeş gəlir. Televiziyadan izləyəndə görmüşəm. Belə ab-havadan çox xoşum gəlir. Azarkeş dəstəyi futbolçuları da irəli itələyir.

- Bakıdakı oyunları izləmək maraqlıdı, yoxsa bölgədə?

- Ab-hava baxımından bölgələrdə daha yaxşıdı. Çünki bu tribunalarda çoxlu azarkeş var. Amma Bakıda keyfiyyət baxımından daha güclü komandalar oynayır. Həmin klublarda millinin daha çox oyunçusu var.

- Bu iki gün yeni kəşflər baxımından sizə nə verdi?

- Bütün matçlara baxıram. Hər oyun mənə mesaj verir. Köməkçilərimlə birlikdə hər şeyə nəzarət edirik. GPS-lə bütün futbolçuları izləyirik. Bunun nəticəsində kimin hansı formada olduğunu bilirik.

- Millidə yeni adlar olacaq?

- Bir həftə sonra biləcəksiz.

- Mövsümün sonunda bir komanda premyer-liqanı tərk edəcək. Son pillələrdə olan komandalar arasında amansız rəqabət var. Bunun yığmaya xeyri haqda nə deyə bilərsiz?

- Bu, çox yaxşıdı. Çempionatı heç kim tərk etməyəndə rəqabət olmur. Təzyiqin olmağı çox yaxşıdı. Çünki çempionatda fərqli ab-hava yaradır.

- Maksim Medvedev milliyə çağırılacaq?

- Bir həftə gözləyin.

- Mahir Emrelinin durumu sizi qane edir?

- Onunla tez-tez danışıram. Oyunlarını izləyirəm. Son matçda 58 dəqiqə oynadı. Çox da yaxşı oynamadı. Amma ilk matçı idi. Ümid edirik ki, yaxşı formada olacaq. Fiziki baxımdan hazır olması bizim üçün üstünlükdü.

- Anton Krivotsyukla Renat Dadaşovu izləyirsiz?

- Renat yaxşı fornadadı. Bütün oyunlarını izləyirəm. Antonun komandası bu gün səhər oyun keçirdi, 0:0 etdilər.

- Millidə olacaqlar?

- Əlbəttə.

- Milli son 5 matçda daha cəsarətli futbol oynadı. Həmin cəsarəti növbəti oyunlarda görə biləcəyik?

- Maksimumumuzu göstərməyə çalışacağıq. Uduzmaq üçün oynamırıq. Bəzən elə rəqib olur ki, bizdən güclüdü, daha motivasiyalı olurlar, topla yaxşı davranırlar.

- Qarşıdakı matçlardan gözləntiləriniz nədi?

- Heç vaxt proqnoz vermirəm. Reallığa baxmağa çalışıram. Məşqlərə başlayanda durumumuza baxacağıq.

İLKİN SULTANLI, Tovuz