Misli premyer-liqasının 26-cı turunda "Kəpəz" "Zirə" ilə heç-heçə etdi - 1:1.

"Football-plus.az" xəbər verir ki, görüşdən sonra hər iki komandanın baş məşqçilərinin mətbuat konfransı keçirildi.

Əvvəlcə meydan sahiblərinin çalışdırıcısı Tərlan Əhmədov görüş haqda fikirlərini səsləndirdi:

"Maraqlı oyunun şahidi olduq. Üç xal qazanaraq mövqeyimizi yaxşılaşdırmağa çalışdıq. Qol vəziyyətlərimiz çox idi. Komandamız yaxşı mübarizə apardı. Məncə, üç xalı itirdik. Təəssüf ki, qol epizodlarını dəyərləndirə bilmədik, Epizoda dəfələrlə baxdıq, orada penalti yox idi. Artıq neçənci dəfədir ki, haqqımız yeyilir. Ən çox sarı vərəqə bizə göstərilir. Yorulmuşuq. Heç nəyimiz olmadığı halda, nələrsə etməyə çalışırıq. Bu vəziyyətdə 21 xal toplamışıqsa, futbolçulara təşəkkür edirəm".

Daha sonra mütəxəssis jurnalistlərin suallarını cavablandırdı...

- Bu otaqda Əfran İsmayılov və Rauf Əliyev haqda sual verəndə demişdiz ki, məqsədim gəncəli futbolçular yetişdirməkdi. 6 ay keçib. Amma bunu meydanda görmək olmur...
- Bundan əvvəlki matçda Mahir Həsənovu görmədiz? Hazır olsalar, oynayarlar. Altı ayda futbolçu hazırlamaq olmur. Naxçıvanda divizionun oyununda 4 qol buraxırlarsa, mən onları necə oynadım. Kim güclüdüsə, onu meydana buraxırıq. Eşitdiyimə görə, Mahiri U-21 yığmasına dəvət edəcəklər. Çağrılmasa belə, bu səviyyəyə gəlməsi onun üçün yaxşıdı.

- Tovuzda bildirmişdiz ki, mən komandanı premyer-liqada saxlayıb istefa verəcəm. Gedəcəksiz?
- İnşallah görəcəksiz. Məni yaxşı tanıyırsız.

- Qazonun vəziyyəti niyə bu haldadı?
- Biz burda oyundan bir gün əvvəl məşq edirik. Meydançanın üstü bağlanmamalıdı. Bizdə isə bağlayırlar. Torpaq günəş enerjisi almadığınına görə vəziyyət acınacaqlıdı. Mən burda məşq etmirəm. Komanda betonun üstündə məşq edir. Əvəzedici heyətimiz də bizim məşq meydanımızda oyun keçirir. Bəzən olur ki, 2 saatlıq məşqi 45 dəqiqəyə keçirəm.

- Yeqor Xvalko ilə Junior Martins arasında nə baş vermişdi?
- Futbolçuların arasında belə anlaşılmazlıqlar olur. Ötürmə vermədiyinə görə narazılıq var idi. Yoluna qoydular.

- Siz getsəz, komandadakı gənclərin vəziyyəti necə olacaq?
- Bunu mən deyə bilmərəm. Vəziyyətimiz çətindi. Komandanın tərcrüməçisi yoxdu. Mən üç dildə danışıram. Bəzən isti su olmur, futbolçular məşqdən sonra gedib evdə çimirlər. Özünüz mövsümün sonunda görəcəksiz. Artıq normal, söz-söhbətsiz komandada işləmək istıyirəm. Komandanın 2 əsr yaşı var. "Kəpəz"ə belə laqeyd münasibət göstərmək olmaz. Avtobusu, tərcüməçisi, vitamini olmayan komadanın premyer-liqada qalmasına çalışıram. Mövsümün sonunda istirahət etmək istəyirəm. İki il istirahət etdim. Gərək istirahətimi dayandırmazdım. Stress yaşayıram.

- Şəraitsizlikdən, vəziyyətdən şikayət etdiniz. Belə başa düşmək olar ki, klub rəhbərliyindən və AFFA-nın qərarlarından narazısız. Qorxmursuz ki, bu fikirlərinizlə hər iki tərəfin qəzəbinə gələrsiz?
- Mən heç kimdən şikayətlənmirəm.

- Klubu premyer-liqaya buraxan AFFA Lisenziyalaşdırma Komitəsi buraxıb. İndiki vəziyyətin pis olması da rəhbərlikdən asılıdı.
- Biz də istəyirik ki, şəraitimiz olsun. 20 il əvvəl Mahmud Qurbanov millidə oynayıb. Bu gün Gəncədə futbolçu yetişmir. Bizə dəstək lazımdı. Hamıya dəstək var, "Kəpəz"ə yoxdu. Niyə?

- Siz iş adamı olsaz, bu qədər söz-söhbət olan kluba pul ayırarsız?
- Qəlbimdə "Kəpəz", Gəncə sevgisi varsa, niyə də yox? Şərait olsaydı, söz-sözhbətlər olmaz. Hamısı işsizlikdəndi. İşsiz adamlar söz-söhbətlər yaradırlar.

İLKİN SULTANLI, Gəncə