Rəşad Sadıqov: "Çalışıram ki, Azərbaycan futboluna yeni oyunçular qazandırım"
Misli premyer-liqasının 26-cı turunda "Kəpəz" "Zirə" ilə heç-heçə etdi - 1:1.
"Football-plus.az" xəbər verir ki, görüşdən sonra hər iki komandanın baş məşqçilərinin mətbuat konfransı keçirildi.
Əvvəlcə qonaqların çalışdırıcısı Rəşad Sadıqov görüş haqda fikirlərini səsləndirdi:
"Çox gərgin oyun oldu. Gəncədə "Kəpəz"ə qarşı oyunlar həmişə belədi. Xüsusi maneələrdən biri də meydançanın durumu idi. Çox baxımlı futbolun şahidi ola bilmədik. Birinci hissədə hər iki komandanın hücumları yaranmışdı. Kobud səhvdən qapımızda qol gördük. Dəyişikliklərdən sonra uğuru rəqib qapısında axtarmağa çalışdıq. Sonda yaxşı kombinasiyalı hücumdan sonra penalti qazandıq. Qələbə də qazana bilərdik. Ancaq matçın ədalətli nəticəsi bərabərlik idi".
Mütəxəssis daha sonra jurnalistlərin suallarını cavablandırdı..
- Fasilədə 3 dəyişiklik etməyiniz nə ilə bağlı idi?
- Nəticəyə görə belə etdik. Buna görə hücumameyilli futbolçulara üstünlük verdik. Meydançanın durumuna görə bilirdik ki, bu gün uzun ötürmələrdən istifadə edəcəyik. Dəyişikliklərdən sonra oyuna canlanma gəldi. Hesab edirəm ki, bu gün bir xal qazandıq. Futbolçularıma təşəkkür edirəm. Yaxşı mübarizə apardılar.
- 3-cü dövrədə 8 oyunda 2 qələbə qazanmısız. Klub rəhbərliyi də görüşü izləyirdi. Onların nəticələrə münasibəti necədi?
- Azərbaycanda hamı nəticəyə görə qiymət verir. Təbii ki, nəticə önəmlidi. Amma yalnız bunu düşünmürəm. Son 8 matçdan ikisi-üçünü çıxmaq şərtilə, çox yaxşı oynamışıq. Daha çox xal yığa bilərdik.
- Mətbuat konfransına gələndə azarkeşlə aranızda gərginlik yaşandı. Nə baş vermişdi?
- Mən azarkeşlə şəkil çəkdirirdim. Kimsə etirazını bildirdi. Yaxınlaşıb soruşdum ki, nə baş verib?
- Gəncəyə ilk dəfə məşqçi kimi gəldiz Hansı hisləri keçirdiniz?
- Gəncə və Tovuz çətin səfər oyunlarıdı. Eyni hisləri keçirdim. Gəncəyə futbolun qayıtması sevindiricidi. Legionerlərə də bildirmişdim ki, bura futbol şəhəridi. Burda hamı futboldan anlayır. "Kəpəz" çox gözəl futbol oynayır. Etdiklərinə heyran qaldım.
- Ötən mövsüm kubokun finalında "Qarabağ"la matça 7 yerli futbolçu ilə çıxmışdız. Bu il isə həm "Şamaxı", həm də "Kəpəz"ə qarşı eyni sayda legionerlə oynadız. Nə baş verir? Niyə həm oyun, həm də nəticə baxımından geriləmə?
- Keçən ilkindən daha yaxşı oynadığımızı düşünürəm. Yaxın günlərdə nəticələri görəcəyik. Elə şeylər var ki, onları etmək vaxt tələb edir. Mənim üçün yerli, legioner fərqi yoxdur. Sağlam rəqabət gedir. Kim daha layiqli olacaqsa, o da oynayacaq.
- Dediz ki, mənim üçün yerli, legioner fərqi yoxdu. Belə olan halda Canni de Byazi, Samir Əliyev milliyə kimləri çağırmalıdı?
- Təbii ki, nə qədər yerli futbolçu oynasa, məşqçilər üçün o qədər yaxşı olar. Amma kim üstündüsə, o da heyətdə yer alır. Dəfələrlə olub ki, "Zirə"dən milliyə futbolçu çağırılmayıb.Yığmanın heç bir futbolçusunu ehtiyatda saxlamıram. Çalışıram ki, Azərbaycan futboluna yeni oyunçular qazandırım.
İLKİN SULTANLI, Gəncə
Digər xəbərlər
