Martın 1-də Türkiyə Futbol Federasiyasının təşəbbüsü ilə zəlzələdən əziyyət çəkən insanlara həsr olunan “Omuz-omuza” (çiyin-çiyinə) adlı möhtəşəm bir yardım kampaniyası keçirildi.

"Football-plus.az" xəbər verir ki, bir müddət öncə buna bənzər kampaniya incəsənət, mədəniyyət xadimləri, iş adamları arasında baş tutmuşdu. Bu dəfə isə federasiya futbol dünyasını bir araya topladı. Türkiyənin Gənclər və İdman Nazirliyi, TFF, Klublar Birliyi və “Bein Media Qrup”un dəstəyi ilə baş tutan yardım kampaniyası “Bein Sports”un studiyasında keçirildi. Acun Ilıcalının aparıcısı olduğu tədbir “Bein Sports”, “A Spor”, “Tivibu Spor”, “TRT Spor” və “TV8,5” kanalları ilə canlı yayınlandı.

Burda Jorje Jezuş, Şenol Günəş, Okan Buruk, Abdulla Avcı, Əmrə Belözoğlu başda olmaqla superliqada çalışan bütün baş məşqçilər, eləcə də elita klublarının futbolçuları, Fatih Terim, Mustafa Dənizli, Ərsun Yanal, Yılmaz Vural kimi tanınmış mütəxəssislər, Arda Turan, Nihat Kahveci, Tuncay Şanlı, Mehmet Topal kimi sabiq futbolçular, Türkiyə yığmasının baş məşqçisi Ştefan Kunts, karyerasını bitirən tanınmış hakim Cüneyt Çakır da iştirak etdi. Bundan başqa, futbol dünyasının bir çox populyar siması da videomesaj vasitəsilə kampaniyaya dəstək verdilər. Onların arasında, Xosep Qvardiola, Yürgen Klopp, Arsen Venger, George Haci, Aleks De Souza, İlkay Gündoğan və Kilian Mbappe də var idi. Xüsusilə də hazırda dünyanın ən yaxşı və populyar oyunçularından biri olan Mbappenin videomesaj göndərməsi Avropa mətbutının da diqqətini çəkdi. Mbappe göndərdiyi mesajda bunları dedi: “Fransızca danışmağa üstünlük verirəm. Bu, həqiqətən də çox böyük bir faciədi. Təsəvvür etməyəcəyimiz qədər böyük bir olaydı. Türklərin həmin an nələr yaşadığını heç təsəvvürümə də gətirə bilmirəm. Bu layihənin bir parçası olduğum üçün qürur duyuram. Türkiyəyə yardım üçün əlimdən gələni edəcəm. Uşaqların təbəssümü və arzuları mənim üçün çox önəmlidi. Əlimdə olan bütün imkanları onlara dəstək ola bilmək üçün sərf edəcəm. Bir çox uşağa yenidən təbəssüm qazandıra biləcəyimizə inanıram. Türkiyə üçün hər şey daha yaxşı olacaq”. Qeyd edək ki, bu kampaniya sayəsində 845,7 milyon lirə (təxminən 76 milyon manat) yardım toplanıldı! Zəlzələ bölgələrində artıq axtarış-xilasetmə əməliyyatları dayandırılıb. Amma həmin bölgələrə ləvazimatların və konteynerlərin göndərilməsi prosesi hələ iyunun ortalarına qədər davam edəcək.

Yeri gəlmişkən, kampaniya zamanı futbolla bağlı iki önəmli xəbər diqqəti çəkdi. Bunlardan biri odu ki, superliqanın qarşıdakı iki turu Türkiyə ərazisində şifrəsiz, yəni tam pulsuz göstəriləcək. Bunu ölkənin gənclər və idman naziri Mehmet Muharrem Kasapoğlu açıqladı. O, bununla bağlı “Bein Sports”la anlaşma əldə etdiklərini dedi. Bundan başqa, yayda üç İstanbul nəhəngi arasında turnir keçiriləcək. Bunu isə Acun Ilıcalı açıqladı: “3 böyük klubumuz arasında gələn mövsüm başlamamış zəlzələnin qurbanlarına həsr olunmuş mini-turnir keçiriləcək. Bilet və yayın gəlirlərinin hamısı zəlzələdən əziyyət çəkən vətəndaşlara göndəriləcək”.