Türkiyə futbolunun ən böyük problemlərindən biri olan yayın məsələsi, nəhayət, yoluna qoyuldu.

Xatırladaq ki, son 5 ildə Türkiyə çempionatının rəsmi yayın hüququ Qətərin “Bein Media” qrupu tərəfindən idarə olunan “Digitürk”ə məxsus idi. Qətərlilər 2016-nın noyabrında 500 milyon dollar qarşılığında beş mövsümlük dönəmi əhatə edən tenderin qalibi olmuşdular. Sonradan Türkiyədə başlayan inflyasiya üzündən qətərlilər bu məbləği ildən-ilə aşağı saldılar. Anlaşmanın müddəti bu yay başa çatdı. Türkiyə Futbol Federasiyası (TFF) yeni tenderi hələ bu ilin fevralında keçirmişdi. O vaxt federasiyanın və klubların gözlədiyi təkliflər gəlmədiyindən tenderin nəticələri rəsmi şəkildə açıqlanmamışdı. Yayın haqqına maraq göstərənlər arasında Səadəttin Saran və Acun Ilıcalı kimi iş adamlarının da şirkətləri var idi. Amma Nihat Özdəmirin istefasından sonra federasiyanın yeni prezidenti seçilən Mehmet Büyükekşi üstünlüyü yenə də “Dıigitürk”ə verdi!

Dünən Büyükekşi və “Digitürk” platformasının Türkiyə çempionatını yayınlayan kanalı olan “Bein Sports”un üst yönəticisi Yusef Əl-Obaydlinin iştirakı ilə imza mərasimi keçirildi. Burda yeni müqavilənin detalları açiqlandı. Beləliklə, Türkiyə çempionatının yayın haqqı qarşıdakı iki ildə də “Bein Sports”a məxsus olacaq. Qətərlilər bunun qarşılığında 2,2 milyard lirə (təxminən 120 milyon 362 min avro) ödəyəcəklər və bu pulun böyük hissəsi superliqa təmsilçiləri arasında bölüşdürüləcək. “Bein Sports”un ilk təklifi 2 milyard 50 milyon lirəyə bərabər idi. Amma danışıqlardan sonra TFF bu məbləği 150 min avro yüksəltməyi bacardı. Tədbirdə iştirak edən Yusef Əl-Obaydli bunları deyib: “İki tərəfin də bu işbirliyinin davam etməsində maraqlı olması anlaşmanın əldə olunmasına yardım etdi. Türkiyə çempionatını tək burdakı insanlar üçün yox, xaricdəkilərə də ən keyfiyyətli şəkildə yayınlamaq üçün əlimizdən gələni edəcəyik. Əl-ələ verib Türkiyə futbolunun marka dəyərini artırmağa çalışmalıyıq. Superliqa dünyada yalnız 105 ölkəyə yayınlanır. Bu rəqəmi artırmalıyıq. Mehmet Büyükekşi bu baxımdan bizə yardım edəcəyını söylədi. İlk növbədə oyunların internetdən qeyri-leqal şəkildə yayınlarının qarşısını almaq lazımdı. Büyükekşi də bu cür düşünür və o da çıxış yolunu axtaracağına dair söz verdi. Bu üzdən məbləği bir qədər də artırdıq. Biz əslində iki il üçün yox, daha böyük müddət üçün burdayıq. Sadəcə, dediyim kimi marka dəyərini artırmaq lazımdı. Bu baş versə, gəlirlər də artacaq