Türkiyə çempionatında bu həftəsonu oyunu olmayan iki kollektiv – ''Qalatasaray''la ''İstanbulspor'' dünən hazırlıq matçında üz-üzə gəlib.

"Football-plus.az" xəbər verir ki, İstanbulda yerləşən ''Nəcmi Kadıoğlu'' stadionunda keçirilən oyun superliqanın liderinin parlaq qələbəsi ilə yekunlaşıb. ''Cim-Bom'' rəqibini 6 cavabsız qolla darmadağın edib. ''Sarı-qırmızılar''ın qollarını 8-ci dəqiqədə Raşitsa, 19-cu dəqiqədə Oliveyra, 40-cı dəqiqədə Qomis, 55-ci dəqiqədə Emin Bayram, 84-cü dəqiqədə Zanyolo və 88-ci dəqiqədə Dyubua vurub. Oyundan əldə olunan gəlir zəlzələnin qurbanları üçün yardım fonduna köçürüləcək. ''Qalatasaray'' zəlzələ üzündən çempionatda yaranmış məcburi fasilə zamanı keçirdiyi 4-cü yoxlama oyununda da uduzmadı. Komanda daha öncə ''Gənclərbirliyi'' (2:2) ilə bərabərə qalmışdısa, ''Pendikspor'' (3:1) və ''Alanyaspor''u (4:2) məğlub etmişdi. İnamla turnir cədvəlinə başçılıq edən ''Aslan'' superliqada növbəti oyununu martın 11-də ''Kasımpaşa''ya qarşı keçirəcək.