Dünya çempionatı ilə bağlı yaranmış fasilədən istifadə edən Türkiyə klubları yoxlama oyunları keçiriblər.

Football-plus.az xəbər verir ki, "Fənərbaxça'' Klublar Birliyi tərəfindən təşkil olunan dostluq turnirinin ilk oyunu çərçivəsində doğma meydanda La Liqa təmsilçisi ''Rayo Valyekano''ilə qarşılaşıb.

Qeyd edək ki, Madrid klubu bu mövsüm İspaniya çempionatında həm səfərdə ''Barselona''dan (0:0), həm də evdə ''Real''dan (3:2) xal almağı bacarıb. Qonaqlar Oskar Trexonun 22-ci dəqiqədə vurduğu qolla fasiləyə öndə yollandılar. Amma İstanbul nəhəngi ikinci hissədə 12 dəqiqə aralığında 3 qol vuraraq inamlı qələbə qazanıb. 71-ci dəqiqədə penaltidən Osayi-Samuel fərqlənibsə, 75-ci dəqiqədə Coşua Kinq komandasını hesabda önə keçirib. Yekun nəticəni isə 83-cü dəqiqədə Fərdi Kadıoğlu müəyyənləşdirib. ''Sarı-lacivərdlilər'' üçün yeganə qanqaraldıcı məqam Joao Pedronun zədələnməsi olub. Təcrübəli oyunçu 68-ci dəqiqədə topuğundan ciddi xəsarət alaraq meydanı xərəkdə və göz yaşları içində tərk edib. Hələ ki, onun hansı müddətə sıradan çıxdığı bəlli deyil.

Onu da bildirək ki, karyerasını ''Rayo Valyekano''da davam etdirən sabiq ''Qalatasaray''lı forvard Radamel Falkao bütün oyunu ehtiyat skamyada keçirib. Turnir çərçivəsində növbəti oyunlar dekabrın 3-də keçiriləcək. ''Fənərbaxça'' bu dəfə ''Vilyarreal''ı qəbul edəcəksə, ''Rayo Valyekano'' ''Qalatasaray''ın qonağı olacaq. Bundan başqa yoxlama oyununda ''Beşiktaş'' ''İstanbulspor''u 4:0 hesabı ilə darmadağın edibsə, Antalyada baş tutan ''İstanbul BŞ'' – ''Hall Siti'' oyununda qalib müəyyənləşməyib (1:1).