İngiltərə Liqa kubokunun finalının protokolunda dəyişiklik edilib.

“Mançester Yunayted” – “Nyukasl” matçında (2:0) vurulan ikinci qolun müəllifi dəyişib. 39-cu dəqiqədə reallaşan həmin qol əvvəlcə “Nyukasl”ın müdafiəçisi Sven Botmanın hesabına avtoqol kimi yazılmışdı. Markus Reşfordun zərbəsindən sonra top ona dəyərək tora daxil olmuşdu. Lakin İngiltərə Futbol Liqasının texniki komitəsi epizodu bir daha dəyərləndirərək avtoqol Reşfordun qolu kimi qeydə alıb.

Nəticədə gənc hücumçu DÇ-2022-dən sonra məhsuldar çıxışını davam etdirib. Markus MY-nin formasında meydana çıxdığı son 19 oyuna komandasına 17 qol və 4 məhsuldar ötürmə ilə faydalı olub.