Acun Ilıcalının sahibi olduğu “Hall Siti” mövsümü zəif və çox qeyri-sabit keçirməkdə davam edir.

Football-plus.az xəbər verir ki, komanda arada 1-2 oyun qalib gələrək fanatlarını sevindirdikdən sonra məğlubiyyətləri sıralamağa başlayır. Ən son srağagün “pələnglər” çempionşipin 19-cu turunda evdə “Middlsbro”ya 1:3 hesabı ilə boyun əydilər. Bu, komandanın ardıcıl 2-ci, son 6 turda 4-cü və son 14 turda 10-cu məğlubiyyəti oldu! 18 oyuna 20 xal toplayan “Hall Siti” 24 komandalı turnirdə yalnız 20-ci yerdədi. Görünən odu ki, Ilıcalının iddialı açıqlamaları ilə komandasınını nəticələri hələlik üst-üstə düşmür.

Baş məşqçi məsələsi ilə bağlı da, nəhayət, yeni xəbər var. Məlum olduğu kimi, sentyabrın 30-da Acun gürcü mütəxəssis Şota Arveladzeni istefaya göndərdi. O vaxtdan bəri komandanı müvəqqəti Endi Douson çalışdırır. Bu ayın əvvəlində türkiyəli iş adamı portuqaliyalı Pedro Martinşlə anlaşmaq üzrə idi. Amma tərəflər son anda maddi məsələlərdə razılığa gələ bilmədikləri üçün təyinat baş tutmamışdı. Düşünmək olardı ki, Acunun anlaşacağı yeni məşqçi futbol dünyasında ən azı Martinş qədər populyar olacaq. Amma İngiltərə mətbuatının ortaya atdığı iddiaya görə “Hall Siti”nin yeni baş məşqçisi Liam Rosenyor olacaq. Halbuki bu şəxs nə futbolçu kimi tanınmışdı, nə də məşqçi kimi normal təcrübəyə malikdi. Komandanın noyabrın 5-də “Miluoll”a qarşı oyuna bu 38 yaşı mütəxəssisin rəhbərliyi altında çıxacağı gözlənilir. Futbolçu kimi peşəkar karyerasında yalnız 6 mövsümü premyer-liqada keçirən Rosenyor məşqçi kimi isə “Brayton” və “Derbi”də köməkçi qismində çalışıb. Baş məşqçi kimi o yalnız 9 oyunluq təcrübəyə malikdi.

“Derbi” onun başçılığı altında 1-ci liqada, yəni 3-cü divizionda bu 9 oyundan 4 qələbə, 2 heç-heçə, 3 məğlubiyyətlə ayrılıb. Rosenyorun xeyrinə olan yeganə amil onun klubu az-çox tanımasıdı. Belə ki, o, 5 il (2010-15) “Hall Siti”nin şərəfini qoruyub. Bu təyinatın xeyrinə ola biləcək başqa amil tapmaq çətindi. Rosenyerin hansı keyfiyyəti ilə Acunun diqqətini cəlb etməsi maraq doğurur. Arveladzenin istefasının ardından kluba yaxınlığı ilə bilinən şəhərin yerli nəşri “Hall Deyli Meyl” mümkün namizədlərin siyahısını tərtib etmiş və fanatlar arasında sorğu keçirmişdi. Nəşr həmin vaxt namizədlər arasında Şon Dayç, Rob Edvards, Xavi Qarsiya, Səbri Lyamuşi ilə yanaşı, Fatih Terim və Şenol Günəşi də qeyd etmişdi. Yəni fanatlar məhz belə tanınmış simalardan birinin komandanın başına keçəcəyini gözləyirdilər.