Leandro Andrade:

“Oyunun ağır keçəcəyini öncədən bilirdik. Çünki qarşımızda çətin rəqib var idi. Buna baxmayaraq, qələbə qazandıq. Heyətdə dəyişikliklər olduğunu da nəzərə almaq lazımdı. Bir çox futbolçular qış fasiləsində komandanı tərk etdi. Əvəzində yeni oyunçular gəldi. Amma yenə də qələbə qazandıq. Hər şey öz əlimizdədi. Qarşıdakı oyunlarda yaxşı nəticələr qazanmaq üçün çalışmaq lazımdı. Komandaya qələbə qazandıran qolu vurmaq üçün hər kəsdə inam olmalıdı. Hamımızda bu inam var idi. Meydana çıxanda hamımızın istəyi qələbə qazanmaq olur. Belə də davam etməliyik”.

Adama Diakabi:

“Çox yaxşı oyun oldu. Qələbə qazandıq. Qarşıda bir oyunumuz da var. Əlimizdən gələni edəcəyik ki, növbəti mərhələyə keçək. Debütümə gəlincə, meydana çıxanda azarkeşlər məni dəstəklədi. Bunu hiss etdim. Elə futbolçuyam ki, belə fanatların qarşısında olmağı sevirəm. Azarkeşlərin mənim üçün etdikləri xoşuma gəldi, əlavə motivasiya oldu. Fanatlarımız çox yaxşıdı. Komanda yoldaşlarım oyuna çıxmamış onlar haqda mənə məlumat vermişdilər. Azarkeşlərin qarşısında oyun keçirməyi həyəcanla gözləyirdim. Baş məşqçi formaya düşməyimə kömək edir. Addım-addım bunun üzərində çalışıram. Komandama daha çox kömək olmağa çalışacam".

Sven Kums:

"Biz topu itirdikdən sonra rəqib ildırım sürəti ilə hücuma keçirdi. Təhlükəli hücumları çox olsa da, həlledici məqamlarda yaxşı çıxış etdik. Vəziyyəti düzəldə bilərik. Azarkeşlərimizin də dəstəyi ilə mərhələni keçmək şansımız var. Bu gün də yaxşı şanslarımız oldu, təəssüf ki, qola çevirə bilmədik. Fasilədən sonra isə oyun xeyli dəyişdi. Rəqib bizi geri çəkilməyə məcbur etdi. Hücumları çətinliklə dəf etdik. Özümüz isə "çərçivə"yə düşə bilmədik. Penalti epizodu ilə bağlı hakim mənə dedi ki, bu həqiqətən də dayaq qoludu, amma bədəndən xeyli aralanıb. Referi birinci hissədə penaltimizi vermədi. Halbuki Bruno Qodoya qarşı aşkar qayda pozuntusu var idi. Rəqibin yerinə yetirdiyi 11 metrlik cərimə zərbəsi zamanı isə qapıçımız Deyvi Ruf əla seyv etdi. "Qarabağ"ın güclü komandadı, lakin ilk yarıda göstərdik ki, bu rəqiblə oynamaq olar. Onları həqiqətən də məğlub edə bilərik. Şansımızın davam etdiyini düşünürəm".