Qış fasiləsində Tula “Arsenal”ını “Sumqayıt”a dəyişən Kamran Əliyevin sənəd problemi səbəbindən premyer-liqada debütü bir qədər yubansa da, “Şamaxı” ilə görüşdə, nəhayət, yeni komandasının heyətində meydana çıxa bildi.

“Kimyaçılar”ın baş məşqçisi Samir Abasov oyunsonrası mətbuat konfransında Əliyevin optimal formada olmadığını söyləməklə yanaşı, ona güvəndiyini dedi. Görəsən, Kamran özü ilk oyunu barədə hansı fikirdədi?

Əliyev “Football-plus.az” saytına açıqlamasında bunları söylədi:

“Əvvəlcə onu bildirim ki, “Sumqayıt”a keçdiyim üçün çox şadam. Çox yaxşı kluba gəlmişəm. İlk oyunumda komandamın qələbə qazanması və mənim də bunda payımın olması sevindirici haldı. Rusiyanın birinci dəstəsi ilə premyer-liqa arasında indiki vəziyyəti nəzərə alsaq, o qədər də böyük fərq yoxdu. Bura gəlməmişdən öncə də Azərbaycan çempionatını izləyirdim”.

Qürbətçi-futbolçu uyğunlaşma ilə bağlı heç bir problem yaşamadığını da bildirdi:

“İlk gündən kollektiv məni özünkü kimi qarşıladı. Bu səbəbdən uyğunlaşma ilə bağlı hansısa çətinliyim yoxdu. Mənə dəstək olduqlarına görə məşqçi korpusuna da təşəkkür edirəm”.

RƏŞAD