Çempionlar Liqasında 3 aydan çox davam edən fasilə başa çatıb.

Artıq turnirin ən maraqlı hissəsinə, yəni pley-offuna start verilib. 1/8 finalda adəti üzrə oyunlar iki həftəyə bölünüb. İlk matç günündə 2 qarşılaşma baş tutub. PSJ "Bavariya"nı, "Milan" "Tottenhem"i qəbul edib.

1/8 final, ilk oyunlar
14 fevral
PSJ - Bavariya 0:1
Kinqsli Koman, 53
Hakim: Maykl Oliver (Almaniya)
Cəzalı: yoxdu
Avokuboklardakı oyunlarının balansı: +6=0-5
Bu iki Avropa nəhəngi son illərdə sanki maqnit kimi bir-birini cəzb edir. Son 6 mövsümə nəzər salsaq, onların yolu artıq 4-cü dəfə kəsişir! Bura 2020-də ÇL-in finalı da daxildi və məlum olduğu kimi, Münhen nəhəngi həmin vaxt Komanın qolu ilə qalib gələrək tarixində 6-cı dəfə bu titula sahib çıxmışdı. Son duel 2020/21-in 1/4 finalına təsadüf edib. Paris nəhəngi həmin vaxt səfər qolu hesabına (səfərdə 3:2, evdə 0:1) mərhələni adlamışdı. Komandaların düşərgəsində hazırda tam fərqli ab-hava hökm sürür. “Bavariya” sentyabrın 17-də “Auqsburq”a minimal hesabla uduzandan bəri keçirdiyi 19 rəsmi matçın heç birində məğlub olmayıb! PSJ isə son iki rəsmi oyunda uduzub. Üstəlik komanda daxilində də ab-hava yaxşı deyil. Amma bir məqamı unutmayaq ki, parislilər son qarşılaşmalarda Mbappeyə həsrət qalmışdılar. Fransalı ulduz fevralın 1-dən bəri zədə üzündən oynamırdı. Onun 3 həftəliyə sıradan çıxdığı deyilirdi. Amma münhenlilərin çalışdırıcısı Yulian Naqelsmann bu xəbərlərə inanmırdı. Zaman göstərdi ki, inanmamaqla çox doğru edirdi. Mbappe də, yüngül zədəsi olan Messi də, Neymar da iştirak ərizəsindədi! Bu əzəmətli “üçlük” meydanda olduqda isə PSJ tam fərqli kollektivə çevrilir. Ona görə də əminliklə söyləmək olar ki, bizi bu gün mövsümün ən maraqlı və hətta ÇL-in finalına layiq olan qarşılaşmalarından biri gözləyir.

Milan – Tottenhem 1:0
Braim Diaz, 7
Hakim: Sandro Şerer (İsveçrə)
Cəzalı: yoxdu
Avokuboklardakı oyunlarının balansı: +0=2-2
Mövsümü inamsız keçirən iki komandanın duelində favoriti müəyyənləşdirmək çətindi. “Milan”ın indiki versiyası mövsümün əvvəlindəki və 2021/22-də çempion olan komandadan çox fərqlənir. Son vaxtlar “rossonyerlər” özünə bənzəmir. Son turda “Torino”nu yenməklə “Milan” 4 oyunluq məğlubiyyət və 7 oyunluq qələbəsiz seriyaya son qoydu. Digər tərəfdən “Tottenhem” də “Mançester Siti”ni məğlub etdikdən bir neçə gün sonra “Lester”ə 1:4 hesabı ilə uduzacaq qədər qeyri-sabit komandadı. Hər halda, doğma fanatları önündə oynadığına görə milanlıları az da olsa, favorit saymaq olar. 2000-ci illərdə həmin o əzəmətli “Milan”, əsasən da pley-offdakı ev oyunlarında əla təsir bağışlayırdı. Kim bilir, bəlkə köhnə “Milan”ın ruhu yenidən qayıdacaq? Londonluların çalışdırıcısı Antonio Konte üçün “Milan”ı prinsipial rəqib saymaq olar. Çünki o, 2 il Milanın digər klubu “İnter”i çalışdırıb. Maraqlıdı ki, onun dönəmində “İnter” “Milan”a qarşı keçirdiyi 5 oyunun 4-də qalib gəlmiş və bu matçların hər birində ən azı 2 top vurmuşdu! Daha bir diqqətçəkən məqam odu ki, “Milan” indiyə qədər “Tottenhem”ə qarşı keçirdiyi 4 görüşün hamısında qələbəyə həsrət qalıb.