Dünən avrokubokların 2021/22 mövsümündə turnirlərdən birinə yekun vurulub: İspaniyanın Sevilya şəhərində Avropa Liqasının (AL) finalı keçirilib. Həlledici matçda “Ayntraxt” ilə “Reyncers” qarşılaşıb.

Komandaların avrokubolardakı yolu daha əvvəl yalnız bir dəfə kəsişib. Çempionlar Kubokunun 1959/60 mövsümünün yarımfinal oyunları almanların total üstünlüyü ilə nəticələnib: Frankfurda 6:1 hesabı ilə qalib gələn “Ayntraxt” Qlazqoda “Reyncers”i 6:3 hesabı ilə məğlub edib. Maraq üçün həmin mövsümün finalının məhz Şotlandiyanın paytaxtında keçirildiyini və “Hempden Park” stadionunda “Ayntraxt”ın “Real” qarşısında aciz qaldığını da yada salaq – 3:7.
Frankfurt klubu qitə kuboklarında Şotlandiya təmsilçilərindən “Reyncers”dən başqa yalnız “Aberdin”lə qarşılaşıb. AL-in sələfi sayılan UEFA kubokunun 1979/80 mövsümünün ilk mərhələsində bu komandaya evdə minimal hesabla qalib gələn “Ayntraxt” səfərdə 1:1 hesablı heç-heçə nəticəsində mərhələni adlayıb. Yeri gəlmişkən, həmin mövsüm bu turnirin qalibi məhz frankfurtlular olublar. Onlar bundesliqanın digər təmsilçisi “Borussiya” ilə iki oyunun ümumi hesabında 3:3-lük bərabərliyə nail olsalar da, münhenqladbaxlılara səfər qolu qaydasına görə üstün gəliblər.

“Reyncers” isə öz növbəsində Almaniya klubları ilə 52-ci görüşünə hazırlaşır. Qlazqoluların qitə arenasında ən çox qarşılaşdıqları rəqiblərin ölkə təmsilçiliyi baxımdan bundesliqa iştirakçılarının 1-ci yerdə olduğunu da qeyd edək. Şotlandiyanın 55 qat çempionunun almaniyalılara qarşı 51 oyununun statistikası belədi: 18 qələbə, 15 heç-heçə, 18 məğlubiyyət. Bu matçlardan yalnız biri finala təsadüf edib. Kuboklar Kubokunun 1967-ci ildə Nürnberqdə keçirilən həlledici oyunu “Bavariya”nın 1:0 hesablı qələbəsi ilə nəticələnib.

Qeyd etdiyimiz kimi, “Ayntraxt” avrokuboklarda indiyədək iki dəfə finalda oynayıb və UEFA kubokundakı cəhdi uğurlu alınıb. “Reyncers” isə həlledici mərhələdə 4 dəfə görünüb. Qlazqolular 3 dəfə Kuboklar Kubokunun finalında gücünü sınayıblar. 1961-ci ildə “Fiorentina”ya ümumi hesabda 1:4, 1967-ci ildə “Bavariya”ya 0:1 uduzan Şotlandiya nəhəngi 1972-ci ildə Moskva “Dinamo”suna 3:2 hesabı ilə qalib gəlib. UEFA kubokunun 2008-ci ildəki finalı isə Rusiyanın daha bir klubunun – “Zenit”in qələbəsi ilə başa çatıb – 2:0.

Sevilyadakı final “Reyncers” üçün “Ayntraxt”dan 62 il əvvəlki darmadağınların əvəzini çıxmaq şansı olacaq. Onu da xüsusi vurğulayaq ki, AL-dəki zəfər komandalara Çempionlar Liqasının qrup mərhələsinə vəsiqə qazandıracaq. “Reyncers” artıq premyer-liqada 2-ci yeri tutmaqla bu turnirin təsnifat mərhələsində oynamaq hüququna yiyələnib. Bundesliqada mövsümü 11-ci yerdə başa vuran və avrokuboklardan kənarda qalan “Ayntraxt”ın şotlandlarla 3-cü görüşdə də qalib gəlmək üçün motivasiyası isə daha yüksək olacaq.

Avropa Liqası, final
Ayntraxt (Frankfurt, Almaniya) – Reyncers (Şotlandiya) 1:1 (Penaltilər - 5:4)
Aribo, 57 - Borrre, 69.
Hakim və köməkçiləri: Slavko Vinçiç, Tomaj Klançnik, Andraj Kovaçiç (hamısı Sloveniya), Srcan Yovanoviç (Serbiya).
VAR hakimləri: Pol van Bukel (Niderland), Yure Praprotnik (Sloveniya), Alexandro Ernandes, Roberto del Palomar (hər ikisi İspaniya).
Cəzalı: yoxdu.
Avrokuboklardakı oyunlarının balansı: +2=0-0; 12-4
18 may. Sevilya (İspaniya), “Ramon Sançes Pisxuan” stadionu.