Bu yay fəal transfer kampaniyası aparan “Barselona” avqustun son və sentyabrın ilk günlərində də bir neçə əməliyyatı reallaşdırıb.

Gözlənildiyi kimi, Martin Breytveytlə yollar ayrılıb. Danimarkalı hücumçunun müqaviləsi qarşılıqlı razılıq əsasında ləğv olunub. Onun sözləşməsinin müddəti 2024-cü ilin iyununa qədər idi. Martin “Barselona”da 2020-ci ildən çıxış edirdi.

Pyer-Emerik Obameyanqın “Çelsi”yə gözlənilən keçidi də rəsmiləşib. London klubu qabonlu hücumçu ilə 2 illik müqavilə bağlayıb. “Zadəganlar” transfer üçün İspaniya klubuna 12 milyon avro ödəyiblər.
Qeyd edək ki, 33 yaşlı futbolçu ötən mövsüm “Barsa”nın heyətində 23 oyuna 13 qol vurub. Pyer-Emerik “Barselona”ya bu ilin yanvarında “Arsenal”dan keçmişdi.

“Milan” isə “Barselona”nın müdafiəçi Serjinyo Desti icarəyə götürüb. 21 yaşlı oyunçu İtaliyada 2023-cü ilin yayına qədər çıxış edəcək. “Barselona”da 2020-ci ildən çıxış edən Serjinyo göy-qırmızı formada keçirdiyi 72 oyunda 3 qol vurub və 5 məhsuldar ötürmə verib.