2002-06-cı illərdə ''Beşiktaş''ın şərəfini qorumuş və klubun tarixində iz buraxmış oyunçulardan olan Daniel Panku da Türkiyədə zəlzələ qurbanlarına yardım edənlərdəndi.

Football-plus.az xəbər verir ki, Panku ilk növbədə ''Kadıköy Panteri'' ləqəbi ilə tanınır.

2005-ci ildə ''Beşiktaş'' səfərdə ''Fənərbaxça'' üzərində 4:3 hesablı tarixi qələbə qazanarkən son 10 dəqiqədə qapını məhz Panku qorumuşdu. Hazırda 45 yaşı olan və Rumıniyanın U-20 yığmasını çalışdıran Panku bütün gəliri yardım fonduna çatmaqla 18 il əvvəlki qarşılaşmada geydiyi qapıçı əlcəklərini hərraca çıxarıb.

''Beşiktaş''ın vitse-prezidenti Əmrə Kocadağ isə AHBAP yardım fonduna 500 min lirə ödəyərək əlcəklərə sahib çıxıb və onları klubun muzeyinə bağışlayıb. Panku bunları deyib:

''Türkiyəni həmişə özümə ikinci vətən saymışam. Zəlzələni eşidən kimi çox üzüldüm. Necə köməy edə biləcəyimi düşündüm və ağlıma əlcəkləri hərraca çıxarmaq gəldi. Əmrə Kocadağ da dəstək verdi və fədakarlığa hazır olduğunu dedi. Çox sevindim. Həm fonda pul köçürüldü, həm də əlcək tarixə düşdü. Yardım məqsədi ilə əfsanə oyunçulardan ibarət olan bir matç da keçirmək olar. Bunu da nəzərdən keçiririk. Bundan sonra da yardım üçün hər cür tədbirlərdə iştirak etməyə hazıram''.