Maks Ferstappen bu yaxınlarda “Drive to Survive” serialını çox tənqid edib və ilk vaxtlar hətta beşinci mövsümdə çəkilməkdən imtina edib, lakin tədricən sənədli filmlərin istehsalçısı “Netflix”in bu işi ilə bağlı fikrini dəyişib.

Football-plus.az xəbər verir ki, ötən il Maks filmin yaradıcılarının çempionatın hadisələrini özünəməxsus şərh etmələrini bəyənməyib, amma görünür, indi ikiqat dünya çempionu bəzi güzəştlərə getməyə və “oyun qaydalarını qəbul etməyə” hazırdı:

“Həmişə demişəm ki, ekranda real həyatda olduğum kimi görünmək istəyirəm. Prodüserlərlə bu mövzuda danışdım, onlar da razılaşdəlar. Başa düşürəm ki, əyləncəni artırmaq üçün nəsə fikirləşməlisən, amma istəyirəm ki, adamların mənim haqqımda real təsəvvürləri olsun, mən belə insanam. Fikrimi nəzərə almağı xahiş etdim, baxmayaraq ki, bu serialın avtoidmanın populyarlaşmasında çox mühüm rol oynaması ilə razılaşmağa hazıram. Ümid edək ki, “Drive to Survive” serialının 5-ci mövsümündə dediklərimi nəzərə alarlar, amma bunu izlədiyimiz zaman anlayacağıq”.