Azərbaycan premyer-liqasında 22-ci turun “Turan Tovuz” – “Kəpəz” (2:0) oyunundan sonra təşkil edilən mətbuat konfransında meydan sahibi komandanın baş məşqçisi Ayxan Abbasov jurnalistlərin suallarını cavablandırdı.

Football-plus.az xəbər verir ki, o, əvvəlcə matç barədə fikirlərini bildirdi:

- Vacib oyun idi. Çempionatı maraqlı edən məqamlardan biri Qərb derbisidir. Bu gün klubumuz Türkiyəyə yardım üçün aksiya keçirirdi. Azarkeşlərimizin fəallığı göründü. Bu atmosferi yaratdıqlarına görə onlara təşəkkür edirəm. Çətin, stresli oyun idi. 90 dəqiqə oyuna nəzarət etdik. Bunu davam etdirməliyik. 3 xal vacib idi. Rəqiblərdən uzaqlaşmaq istəyirdik. Qarşımıza qoyduğumuz məqsəd inkişaf etməkdir. Ağır qrafikdə idik. İndi bir az vaxt olacaq. Komanda yorğun idi. Amma mübarizələrinə görə futbolçularımı təbrik edirəm.

- Yeni sponsor – “Huner Group”la müqavilə imzalanması ab-havaya necə təsir edib?

- Futbolumuz üçün önəmli addımdır. Sponsorsuz çətindir. “Turan Tovuz”un gələcəyi üçün böyük addımdır. Klub rəhbərliyi ilə çox əziyyətlər çəkmişik. Ən çətin anlarda İcra Hakimiyyəti dəstək oldu. Futbolun İnkişaf Fondu bizə sponsorlar axtarırdı. Təşəkkür edirəm ki, bu alındı. Ehtiram Quliyev futbolumuzun gələcəyini fikirləşir. Futbolumuza belə insanlar lazımdır. Ümumi inkişaf fikri var, 1-2 illik düşünmürlər. Hesab edirəm ki, bu anlaşmadan Tovuz qazanacaq.

- Yeni sponsorla görüşünüzdə qarşıya hansısa məqsəd qoyulub?

- Bir məqsəd qoyulmayıb. Real duruma görə yanaşırıq. Gələcək üçün planlar var. Klub olaraq böyümək, inkişaf etmək istəyirik. Ehtiram müəllim öncə nəticəni fikirləşmir. Premyer-liqada güclü klublar var. Onlarla mübarizə aparmaq üçün vaxt lazımdır.

- Komanda bir qədər aqressiv görünürdü...

- Bir çox oyunlarda belə çıxış etmişik. Evdə azarkeş dəstəyi də təsir edir. Bu tempdə oynaya bilirik. Rəqibdən rəqibə fərq var. Bəzi komandalara qarşı 90 dəqiqə tempi saxlamaq olmur. Futbolçular motivasiyalı idilər. Sevinirəm ki, futbolçular səhv etməməyə çalışdılar.

- Yeni sponsor oyundan sonra mükafatla bağlı artım sözü verdi?

- Oyundan əvvəl də gəlmişdi. Komanda ilə görüşdü, motiovasiya verdi. Paltardəyişmə otağında bu, hiss olundu.