“Şamaxı” əzmkar komandadır. Hər komanda buradan xal apara bilmir. Biz isə son turlar şanssızlıq yaşayırdıq. Xal qazanmalı olduğumuz oyunlarda buraxılan səhvlər məğlubiyyətə gətirib çıxarırdı”.

Football-plus.az xəbər verir ki, bu sözləri “Turan Tovuz”un baş məşqçisi Ayxan Abbasov Misli Premyer Liqasının 21-ci turunda “Şamaxa”nı 1:0 hesabı ilə məğub etdikləri oyundan sonra deyib.

O, komandasının minimal hesablı qələbəsini belə şərh edib:

“Bu gün daha düzgün, daha diqqətli oynadıq. Müdafiədə etibarlı çıxış etdik. Bilirdik ki, “Şamaxı” da meydana qələbə üçün çıxacaq. Qazanılan qələbə münasibəti ilə futbolçularımı, azarkeşlərimizi təbrik edirəm. Bizim üçün vacib 3 xal qazandıq. Son turlar əsas rəqiblərimizlə aramızdakı xal fərqi azalmışdı. Heyətdə cəzalı, zədəli futbolçuların olması işimizi çətinləşdirirdi. Buna görə də heyətdə müəyyən dəyişiklik etmişdik. Futbolçulardan razı qaldım. Əzmkar oyun nümayiş etdirdik. Matçın taleyini 1 qol həll edəcəkdi. Şükürlər olsun ki, həmin qolu da biz vurduq”.

Abbasov rəqibin oyununu analiz etdiklərini bildirib:

“Oyundan oyuna fərq var. “Şamaxı”nı oyun üslubunu analiz etmişdik. Bilirdik ki, çox sıx müdafiə olunurlar və hücumlara çox tez çıxırlar. Top itkisindən sonra rəqibə boşluqlar verməməli idik. Rəqibin müdafiə xəttini yarmaq da çətin idi. Elə oyunlar var ki, səbrli olmalı, öz vaxtını gözləməlisən. Bugün də elə oldu”.

Kubok oyunu da nəzərə alınmaqla, cari mövsüm artıq üçüncü dəfədir ki, “Turan Tovuz” səfərdə “Şamaxı”nı 1:0 hesabı ilə məğlub edir. Tovuz klubunun çalışdırıcısı uğurlu statistikaya belə münasibət bildirib:

“Bu statistika mənə də maraqlı gəldi. “Şamaxı” həqiqətən də öz meydanında heç kimə asanlıqla məğlub olmur. Komandanın heyəti gənc, yaxşı futbolçulardan ibarətdir. Hər bir rəqibə qarşı layiqli müqavimət göstərirlər. İddialı komandalar da burada əziyyət çəkirlər. Qələbə qazanmaq bizi sevindirir”.

Komandaya yeni sponsor cəlb olunması ilə bağlı sualı Ayxan Abbasov belə cavablandırıb:

“Mən həmişə demişəm ki, bölgə klublarına sponsor lazımdır. Fərqi yoxdur “Turan Tovuz” olsun, “Şamaxı” olsun, yaxud “Kəpəz”. Tək dövlətin ayırdığı pulla mübarizə aparmaq, inkişaf etmək çox çətindir. Bu gün həm Tovuz Rayon İcra Hakimiyyəti, həm AFFA, həm Futbolun İnkişaf Fondu həqiqətən də komandamıza sponsor tapılması üçün çox ciddi işlər görürlər. Yeni sponsorla bağlı söhbət var. Lakin hələ ki məsələ rəsmiləşməyib. Yəqin ki, qarşıdakı günlərdə hər şey məlum olacaq. Klubların sponsoru olmalıdır ki, çatışmazılqları aradan qaldıra bilək, uşaq futbolunu inkişaf etdirək”.