Konfrans Liqasında pley-off mərhələsində “Qarabağ”ın rəqibi olan “Gent”in planı baş tutmayıb.

Əldə etdiyimiz bilgiyə görə, belçikalılar ölkəmizə 1 gün tez səfər etmək istəyində olub. Hətta “Gent” rəsmiləri özləri üçün məşq etməyə məkan da tapıblar. Onlar bunun üçün 2 ay öncədən Bakı Olimpiya Stadionuna müraciət ediblər. Lakin sonradan belçikalılar bir dəfə məşq keçmək üçün arena ilə müqavilə bağlamayıblar. Buna səbəb Bakıya oyundan 1 gün öncədən gəlmələri olub. “Gent” bu addımı atmağa məcbur olub. Belə ki, “buğalar” fevralın 11-də çempionatda “Vesterlo” ilə səfərdə qarşılaşacaqlar. 5 gün sonra Konfrans Liqasının pley-offunda Bakıda “Qarabağ”ın qonağı olacaqlar. Ayın 19-da isə yenə daxili çempionatda “Leven”i qəbul edəcəklər. 8 gün ərzində 3 qarşılaşmaya çıxmalı olan komanda vaxt baxımından çatdıra bilmədiyi üçün Bakı planını təxirə salmalı olub.

Yeri gəlmişkən, "Gent" Belçikada "Qarabağ"a qarşı keçirəcəyi cavab oyununun biletlərini satışa çıxarıb. Xəbəri klubun rəsmi saytı yayıb. Ən ucuz biletin qiyməti 5 avro, ən bahası isə 35 avrodu.