Mövsümün gedişində çoxlu oyunçusu zədələnən və nəticələri pisləşən “Çelsi” itkiləri “sığortalamaq” üçün qış “transfer pəncərəsi”ndən maksimum yararlandı. London klubunun bu planda böyük fəallıq sayəsində transfer bazarını “partlatdığını” əminliklə iddia etmək olar.

“Zadəganlar” Avropanın əksər ökələrində tətbiq olunan qış transfer əməliyyatları üçün nəzərdə tutulan son iki gündə - yanvarın 30-31-də daha bir neçə keçidi reallaşdırıb. Əvvəlcə “Lion”un müdafiəçisi Malo Qüsto transfer olunub. 19 yaşlı futbolçu bu mövsümü icarə əsasında hazırkı klubunda başa vuracaq. 2016-cı ildən “Lion”un aşağı yaş qruplarında oynamağa başlayan yeniyetmə növbəti mövsümdən sıralarına qoşulacağı londonlularla müddəti 2030-cu ilin yayına qədər nəzərdə tutulan müqavilə imzalayıb. “Çelsi”yə 35 milyon avroya satılan Malo lionluları bonus kimi daha 5 milyon avro irəli sala bilər.

Nəhayət, İngiltərə nəhəngi çoxdan “elçi düşdüyü” Entso Fernandesin məsələsini də yoluna qoyub. Qeyd edək ki, argentinalı yarımmüdafiəçi hələ Qətərdə keçirilən dünya çempionatı vaxtı “zadəganlar”ın diqqətini cəlb etmişdi. “Benfika” 22 yaşlı futbolçunun qiymətinin 120 milyon avro olduğunu bəyan etmişdi. “Çelsi” rəhbərliyi əvvəlcə bu məbləğin 70 milyonluq hissəsini nağd təzminat, digər hissəsini isə azı iki oyunçusunu lissabonluların sıralarına göndərməklə ödəməyə hazır olduğunu təklif etmişdi. Bu varianta razılaşmayan qarşı tərəf Entsonu yalnız nağd qiymətə satmaqda qərarlı idi. Portuqaliya klubunun prezidenti Manuel Ruy Koşta bir neçə gün əvvəl ingilislərin futbolçunu nağd məbləğə, lakin mərhələli ödənişlə transfer etmək təklifini də geri çevirmişdi. “Çelsi”nin həmsahibi Todd Bouli çox çək-çevirdən sonra yanvarın son günündə “Benfika”nın şərtini qəbul etməyə məcbur olub. Bu məsələdə Fernandesin karyerasını premyer-liqada davam etdirmək istəyinin də böyük rolu olub.

Beləliklə, DÇ-2022-nin ən yaxşı gənc futbolçusu seçilən dünya çempionu yeni klubuna 121 milyon avroya başa gəlib. Entso İngiltərə futbolunun tarixinə ən bahalı oyunçu kimi düşüb. O, 2021-ci ildə “Aston Villa”dan 117,5 milyon avroya “Mançester Siti”yə satılan yarımmüdafiəçi Cek Qrilişin rekordunu yeniləyib. Fernandes həmçinin futbol tarixinin ən bahalı argentinalı oyunçusu statusunu qazanıb. O, 2016-cı ilin yayında “Napoli”dən 90 milyon avroya “Yuventus”a satılan hücumçu Qonsalo İquaynın rekordunu arxada qoyub. Və ən əsası, Entso futbol tarixinə 6-cı ən bahalı transfer kimi düşüb. O, bu planda Neymar, Kilian Mbappe, Usman Dembele, Filippe Koutinyo və Joao Felişdən geri qalır.

Yeni klubu ilə 2031-ci il iyunun 30-na qədər müddəti nəzərdə tutan müqavilə bağlayan Fernandesin iş yerini dəyişməsi “River Pleyt”i də irəli salıb. O, “Benfika”ya 2022-ci ilin yayında bu klubdan gəlmişdi.

Müqavilənin bəndlərindən birində futbolçunun sonrakı satışından əldə ediləcək təzminatın 25 faizinin Argentina klubuna çatacağı, “River Pleyt”in həmrəylik ödənişləri mexanizmi nəticəsində daha 4 milyon avro alacağı qeyd edilmişdi. Başqa sözlə, Buenos Ayres klubu yetirməsinin “Çelsi”yə satışından 34 milyon avro qazanc götürüb. Xatırladaq ki, Fernandes “River”ə 2019-22-ci illərdə məxsus olub, 2020-21-ci illərdə icarə əsasında “Defensa y Xustisiya”da çıxış edib. “Benfika”ya 14 milyon avroya satılan yarımmüdafiəçi bu komandada bütün turnirlərdə keçirdiyi 29 oyunda 4 qolun və 7 məhsuldar ötürmənin müəllifi olub.

“Çelsi”nin qış “transfer pəncərəsi”ndə heyətinə yeni futbolçular qatmaq üçün xərclədiyi məbləği də nəzərinizə çatdıraq. BBC-nin yaydığı məlumata görə, London klubu bu planda təxminən 323 milyon funt sterlinq xərcə düşüb. “Çelsi” David Fofana (10 milyon), Andrey Santos (18 milyon), Benua Badyaşil (35 milyon), Joao Feliş (9,7 milyon, icarə), Mixail Mudrik (88,5 milyon), Noni Madueke (29 milyon), Malo Qüsto (26,3 milyon) və Fernandesə (106,8 milyon) görə xəzinəsindən bu qədər pul çıxarıb. Məlumatda “zadəganlar”ın yanvarda ümumilikdə La Liqa, A seriyası, Liqa 1 və bundesliqadakı bütün klublardan daha çox xərclədiyi də qeyd edilib.

Amma ilin ilk ayının son günündə “Çelsi”ni tərk edən oyunçu da olub. “Arsenal” əzəli rəqibindən Jorjinyonu transfer edib. London klubu italiyalı yarımmüdafiəçi üçün 10 milyon funt sterlinq təzminat ödəyib. Müqavilədə 2 milyon funt sterlinq məbləğində bonus da nəzərdə tutulub. 31 yaşlı futbolçu göy formada 2018-ci ildən çıxış edirdi. O, bu mövsüm premyer-liqada 18 oyuna çıxıb, 2 qol vurub və 2 məhsuldar ötürmə verib. AÇ-2020-nin qalibinin cari mövsümdə bütün turnirlərdə 25 matçda 3 qol vurduğunu da qeyd edək.

Football-plus.az