UEFA “Yuventus”u avrokuboklardan kənarlaşdıra bilər. Bu haqda “La Gazzetta dello Sport” məlumat yayıb.

Football-plus.az xəbər verir ki, İtaliya qəzetinin xəbərinə görə, klubda maliyyə pozuntusu ilə bağlı şübhə doğuran faktlar təsdiqlənəcəyi halda “Yuventus”a bir sıra sanksiyalar verilə bilər. Mümkün cəzaların siyahısına cərimələnmə, avrokuboklarda iştiraka görə gəlirlərdən məhrum edilmə, avrokuboklarda iştirak ərizəsində oyunçu sayı ilə bağlı məhdudlaşdırma və UEFA-nın bayrağı altında keçirilən turnirlərdən kənarlaşdırılma kimi sanksiyalar daxildi.

Xəbər verdiyimiz kimi, İtaliyanın hüquq-mühafizə orqanları klubda mümkün maliyyə pozuntuları ilə bağlı araşdırma aparır. “Yuventus” rəhbərliyi üç il ərzində təxminən 200 milyon avro məğbləğində itkini gizlətməkdə ittiham olunur.

İtaliya mənbələrinin məlumatına görə, “Yuventus” koronavirus pandemiyasının 2020-ci ilə təsadüf olunan ilk mərhələsi zamanı oyunçulara gizli şəkildə maaş ödəyib. Halbuki həmin vaxt klub futbolçuların 4 aylıq maaşdan imtina etdiklərini rəsmən bəyan etmişdi. Amma rəhbərlik 17 futbolçuya qeyri-qanuni olaraq ümumilikdə 60 milyon avro ödəyib. Bunun üçün futbolçularla gizli müqavilələr bağlanılıb və onlara yüksək məbləğdə pul ödənilib.

Klubun və artıq noyabrda istefaya yollanan sabiq bosların aqibəti gələn ilin iyununa qədər müəyyənləşməlidi.