“Yuventus” ətrafında qalmaqal getdikcə dərinləşir.

Football-plus.az xəbər verir ki, İtaliya Prokurorluğundan sonra UEFA da Turin klubu ilə bağlı təhqiqata başlayıb.

Yerli mənbələrin yaydığı xəbərə görə, buna “Yuventus” rəhbərliyinin koronavirus pandemiyasının 2020-ci ilə təsadüf edən ilk mərhələsində oyunçulara gizli şəkildə maaş ödəməsi səbəb olub. Həmin vaxt klub futbolçuların 4 aylıq maaşından imtina etdiyini açıqlamışdı. Əslində isə gizli şəkildə 17 futbolçuya təxminən 60 milyon avro ödənildiyi iddia olunur. “Yuventus”un və bu əməliyyata imza atanların ciddi cəzalara məhkum edilə biləcəyi vurğulanır. Xatırladaq ki, bu işlə bağlı Andrea Anyelli prezident, Pavel Nedved isə vitse-prezident vəzifəsindən istefa vermişdi.