“Ayaks”ın yeni baş məşqçisi müəyyənləşib. Niderland klubunun rəhbərliyi Con Heytinqaya etimad göstərib.

Bu vəzifədə ötən həftə istefaya göndərilən Alfred Sxroyderi müvəqqəti əvəzləyən Heytinqa komandanı ölkə çempionatının son oyununa hazırlamışdı. “Ayaks”ın yanvarın 29-da səfərdə “Ekselsior”u 4:1 hesabı ilə məğlub etməsi rəhbərliyin qərarına çox təsir edib. Qeyd edək ki, komanda bununla erediviziyada 7 oyunluq qələbəsizliyə son qoymuşdu. Daha əvvəl klubun aşağı yaş qrupları üzrə komandalarını çalışdıran 39 yaşlı mütəxəssislə daimi əsasda müqavilə bağlanıb. Niderland millisinin sabiq üzvü olan Heytinqa amsterdamlılara mövsümün sonunadək başçılıq edəcək.