“Ayaks” Erik ten Haqa xələf axtarır. Niderland klubu artıq onun gedişi ilə barışıb.

“Mançester Yunayted”in yeni baş məşqçisinin adına aydınlıq gəlib. Əksər mənbələr İngiltərə klubunun Ten Haqla 4 illik müddətə razılığa gəldiyini xəbər verib. Niderlandlı mütəxəssis mövsümün sonunda Amsterdam klubundan ayrılıb MY-nin “sükanı arxasına” keçəcək. Ten Haq baş məşqçi vəzifəsində müvəqqəti işləyən Ralf Ranqniki əvəzləyəcək.

Amma 52 yaşlı mütəxəssisin təyinatı ilə bağlı rəsmi məlumat bazar günündən tez açıqlanmayacaq. “Ayaks” həftəsonu ölkə kubokunun finalında PSV ilə qarşılaşacaq. MY rəhbərliyi mövsümü “qızıl dubl”la başa vurmaq şansı olan “Ayaks”a münasibətdə hörmətəlayiq hərəkət etməyi lazım bilir.

Hazırkı məqamda isə amsterdamlıların yadına Peter Bos düşüb. Niderland klubu sabiq məşqçisini geri qaytarmağı planlaşdırır. Hazırda “Lion”u çalışdıran 58 yaşlı mütəxəssis “Ayaks”a 2016/17 mövsümündə başçılıq edib. Paytaxt komandası həmin mövsüm Avropa Liqasının finalına qədər irəliləmiş və Joze Mourinyonun çalışdırdığı MY-yə uduzmuşdu (0:2).