Nəhayət, “Çelsi” ilə “Lester” arasında uzun sürən danışıqlar sona çatıb.

London klubu Uesli Fofananın transferini rəsmiləşdirib.

Paytaxt klubunun saytının məlumatına görə, 21 yaşlı müdafəçi ilə 7 illik müqavilə imzalanıb. “Zadəganlar” bu keçidə görə qarşı tərəfə 70 milyon funt sterlinq təzminat və 5 milyon funt sterlinq bonus (82,5+5,8 milyon avro) ödəyəcəklər. Fofana “Lester”də 2020-ci ildən oynayırdı. O, bu mövsüm premyer-liqanın 2 oyununda iştirak edib.

Yeri gəlmişkən, son günlər “Çelsi”ni iki futbolçu tərk edib. Kallum Hadson-Odoi icarəyə verib. 21 yaşlı yarımmüdafiəçi cari mövsümü icarə əsasında “Bayer-04”də keçirəcək. Amma “Çelsi”nin gələn ilin yanvarında onu icarədən çıxarmaq variantı var. Ötən mövsüm premyer-liqada 15 matça çıxıb 1 qol vuran Hadson-Odoi iş yerini oyun praktikası sarıdan korluq çəkdiyi üçün dəyişmək istəyib.

Ross Barkli də londonlulardan ayrılıb. 28 yaşlı yarımmüdafiəçi ilə müqaviləyə qarşılıqlı razılaşması əsasında xitam verilib və Ross azad agent statusuna yiyələnib. O, “Çelsi”yə 2018-ci ilin yanvarında “Everton”dan transfer olunmuşdu. Barkli ümumilikdə paytaxt klubunda 100 oyuna çıxıb və 12 qol vurub.