Uruqvay yığmasının və komandanın bir neçə oyunçusunun aqibəti müəyyənləşib. Cənubi amerikalılar DÇ-2022-nin Qana ilə matçında baş verən insidentlərə görə cəzalanıblar.

Football-plus.az xəbər verir ki, bu barədə FİFA-nın saytı məlumat yayıb.

Xatırladaq ki, Uruqvay millisi Qətərdə keçirilən mundialın qrup mərhələsinin son turunda Qana üzərində qələbə qazansa da (2:0) da, daha az qol vurduğu üçün Koreyadan geri qalaraq pley-offa çıxa bilməmişdi. Matçdan sonra uruqvaylı futbolçular insident törətmişdilər. Onlar qanalıların qapısına iki penalti təyin etməyən almaniyalı Daniel Zibertin başçılıq etdiyi hakimlər briqadasına hücum çəkmişdi. “Atletiko”nun müdafiəçisi Xose Ximenes hakimləri söymüşdü. O, bu azmış kimi, Zibertə hücum etmək istəyərkən, səhvən FİFA-nın direktorlarından birini dirsəyi ilə vurmuşdu.

FİFA Uruqvay Futbol Assosiasiyasını (UFA) yığmanın azarkeşlərinin milli ayrı-seçkiliyə əl atmasına, həmçinin komanda üzvlərinin nalayiq davranışına, təhqirlərinə və “ədalətli oyun” prinsiplərini pozmasına görə cəzalandırıb. FİFA-nın Nizam-İntizam Komitəsinin qərarı ilə Uruqvay yığmasının ali təşkilatın bayrağı altında keçirəcəyi növbəti ev oyununda stadionun qismən bağlanması lazım bilinib. UFA həmçinin 50000 İsveçrə frankı məbləğində cərimələnib. Bir sıra futbolçulara da sanksiya tətbiq edilib. 4 oyunluq cəzalanan, 20 min frank cərimə olunan Ximenes FİFA-nın ictimai işlərində iştirak etməlidi. “Qalatasaray”ın 36 yaşlı qapıçısı Fernando Muslera da analoji cəzanı alıb. “Valensiya”nın hücumçusu Edinson Kavani 1 oyunluq cəzalanıb, 15 min frank cərimələnib və FİFA-nın ictimai işlərində iştirak etməlidi. “Veles Sarsfild”in müdafiəçisi Dieqo Qodinə də eyni cəza kəsilib.