“Webcoder” 2018-də “Qarabağ”la da əməkdaşlıq edib...

Uzun müddətdi “Kəpəz”in sayt problemi həllini tapmır. Klub bu məsələni yoluna qoymaq üçün ölkənin tanınmış şirkətlərindən biri ilə əməkdaşlıq edirdi. Lakin bi müddət sonra bəzi texniki problemlər üzündən işlər yarımçıq qaldı. Bundan sonra isə saytın hazırlanması prosesinə yenidən sıfırdan başlandı. Bir müddət davam edən durğunluqdan sonra klub rəhbərliyi yeni agentliklə müqavilə bağladı.

Müqavilə Futbolun İnkişaf Fondunun vasitəçiliyi ilə “Webcoder” agentliyi ilə imzalanıb. Müqaviləyə əsasən, “Kəpəz” üçün veb-saytın hazırlanması, təhlükəsizliyinin təşkili, hostinq və korporativ e-mail xidməti, domenin qeydiyyata alınması işləri görüləcək. Bunu nəzərə alaraq şirkətlə əlaqə saxladıq.

Maraqlıdı, “Webcoder” “Kəpəz”ə nə vəd edib? Uzun müddət davam edən bu problemin həlli nə vaxta yekunlaşacaq? Klub agentliyin başqa hansı xidmətlərindən yararlanmaq niyyətindədi? Bu suallarla “Webcoder”in icraçı direktoru Nərgiz İbrahimovaya müraciət etdik.

- Agentlik olaraq kluba bu məsələdə nə vəd edibsiz?

- Öncə onu qeyd edim ki, saytdan əlavə, mobil tətbiqin hazırlanması da nəzərdə tutulub. Azarkeşlər veb-sayt və mobil tətbiq vasitəsilə keçiriləcək oyunlar və onların nəticələri, klubun yeni nailiyyətləri və onunla bağlı son xəbərlər ilə rahat şəkildə tanış ola biləcəklər.

- İşə start verilib?

- Bəli, artıq dizaynın hazırlanma mərhələsindəyik.

- “Kəpəz” üçün hansı imkanlara, üstünlüklərə malik sayt hazırlayacaqsız?

- Saytın hazırlanma mərhələsində ən son texnologiyalardan istifadə olunur. Komanda ilə bağlı bütün məlumatlar azarkeşlər üçün əlçatan olacaq.

- Saytın strukturu necə olacaq?

- Saytda müxtəlif bölmələr yer alacaq. Komanda - burda klubun tarixi, nailiyyətləri, hər oyunçunun bioqrafiyası, statistikası, foto və videoqalereya yer alacaq. Struktur – bu bölmədə komandanın İdarə Heyəti haqda məlumat təqdim olunacaq. Oyunlar – keçmiş və gələcək matçlar, hər görüşə əsasən əsas və əvəzedici heyət, statistika, icmal və fotolar təqdim olunacaq. Cədvəl – mövsüm üzrə oyunların tarixi bu bölmədə aydın şəkildə göstəriləcək. Bilet satışı – azarkeşlər sayta keçid etməklə bilet almaq imkanı qazanacaq. Xəbərlər – bu səhifədə komanda haqda bütün maraqlı xəbərlər paylaşılacaq. Gəncə futbolu – bu bölmə Gəncə futbolunda qazanılan nəaliyyətlərin paylaşılması üçün nəzərdə tutulub. Qalereya – oyunlardan və tədbirlərdən fotolar paylaşılacaq. Shop – fanat məhsullarının satışı üçün nəzərdə tutulan bu bölmədə pərəstişkarlar istədikləri məhsulu onlayn ödəmə etməklə ala biləcəklər.

- Sayt nə vaxt tam hazır olacaq?

- İşlər 2 aya tam yekunlaşacaq.

- SMM və başqa xidmətləriniz də mövcuddu. "Kəpəz" sizin bu xidmətlərinizdən də istifadə edir, yoxsa yalnız saytın yığılması istənilib?

- Veb-sayt SEO strukturuna uyğun hazırlanır. SMM xidməti isə klubun daxili əməkdaşları tərəfindən həyata keçirilir.

- Bundan öncə hansısa klub, federasiya ilə saytın yığılması, SMM xidməti və başqa proseslərlə bağlı əməkdaşlıq etmisiz?

- 2018-ci ildə “Qarabağ” üçün veb-sayt və mobil tətbiq hazırlamışıq. İndi isə tətbiq və sayt yenə də bizim tərəfimizdən yenilənir, foto və video çəkilişlər də aparılır. Dövlət qurumlarının bir çoxu ilə də işləmişik. Məsələn, 44 günlük muharibənin zəfər saytını, memorial saytını (şəhidlər haqda), Mədəniyyət Nazirliyinin rəsmi saytını da biz hazırlamışıq.

ŞAİR ABDULLA