Cokoviçdən möhtəşəm nəticə: 10-cu final, 10-cu qələbə!
Bazar günü Avstraliya Açıq Tennis Çempionatına yekun vuruldu.
Şənbə günü qadınlar arasında final oyunu keçirildi. 24 yaşlı Arina Sobolenko Yelena Rıbakinanı məğlub etməklə karyerasında ilk dəfə “Böyük dəbilqə” turnirinin qalibi oldu. Cari mövsümdə ardıcıl 11-ci qələbəsini qazanan belaruslu xanım WTA reytinqində 2-ci pilləyə də yüksəldi.
Kişilər arasında final oyunu da gərgin mübarizə şəraitində keçdi. Xüsusən də 2-3-cü setlər. Novak Cokoviç Stefanos Sisipasın müqavimətini 2 saat 59 dəqiqə ərzində qırdı. Serb tennisçi Avstraliya turnirini 10-cu, “Böyük dəbilqə” seriyasını isə 22-ci dəfə qazandı. “Böyük dəbilqə”də qələbə sayına görə Rafael Nadala çatan Cokoviç “Uimbldon”u 7, “US Open”i 3, “Rolan Qarros”u da 2 dəfə qazanıb.
Ümumiyyətlə, karyerasında 93-cü turniri qazanan Cokoviç Nadalı arxada qoydu. Onu yalnız İvan Lendl (94), Rocer Federer (103) və Cimmi Konnors (109) qabaqlayır.
Sisipas finalın ardından Cokoviçə müraciət etdi:
“Sənin nail olduqların qeyri-adidi, tennis üçün etdiklərinə heyranam. Mən hədsiz çox oyun keçirmişəm. Ancaq yalnız sən məni və başqalarını maksimum potensial göstərməyə məcbur edirsən. Novak nə vaxtsa əlinə raketka götürənlərin ən dahisidi. Əvvəllər heç vaxt bunu deməmişəm – idmanımızı irəli apardığına, qadir olduğumuz keyfiyyətləri göstərməyə yardım etdiyinə görə sağ ol”.
Qələbədən sonra göz yaşını saxlaya bilməyən Cokoviç isə belə dedi:
“Sisipasın sözləri məni həyəcanlandırdı. Bunu yüksək dəyərləndirirəm. Kortda biz rəqibik, ancaq bu o demək deyil ki, bir-birimizə hörmət etməməliyik. Bunun sənin üçün son “Böyük dəbilqə” finalı olmayacağı dəqiqdi. Sisipasın komandası, onu yaxşı adam və oyunçu etmək üçün çox vaxt sərf edirsiz. Stefanos, sən elə beləsən – yaxşı adam və tennisçi”.
final
kişilər, fərdi
Cokoviç (Serbiya, 4) - Sisipas (Yunanıstan, 3) 6:3, 7:6 (7:4), 7:6 (7:5)
cütlük
Hiikata/Kubler (Avstraliya) – Nis/Zelinski (Fransa/Polşa) 6:4, 7:6 (7:4).
qadınlar, fərdi
Sobolenko (Belarus, 5) - Rıbakina (Qazaxıstan, 22) 4:6, 6:3, 6:4
cütlük
Kreyçikova/Sinyakova (Çexiya, 1) - Aoyama/Sibahara (Yaponiya, 10) 6:4, 6:3.
mikst
Stefani/Rafael Matos (Braziliya) – Mirza/Bopanna (Hindistan) 7:6 (7:2), 6:2
Digər xəbərlər
