Avstraliya Açıq Tennis Çempionatında dünən son finalçılar da müəyyənləşdi.

Srağagün qadınlar arasında həlledici oyunun iştirakçıları bilindi. Maraqlıdı ki, Belarus finalı gerçəkləşə bilərdi. Ancaq Arina Sobolenko Maqda Linettin öhdəsindən gəldisə, Viktoriya Azarenko Yelena Rıbakina ilə bacara bilmədi.

Kişilər arasında da maraqlı mübarizə gedir. Bu turnirdə ölkəmizin ərazi bütövlüyünə qarşı davranışla yadda qalan Karen Xaçanovu dayandıran tapıldı. Erməni əsilli Rusiya təmsilçisi 3 saat 24 dəqiqə davam edən oyunda Stefanos Sisipasa uduzdu. 24 yaşlı yunan “Australian Open”də kişilər arasında 2011-dən bəri ən gənc finalçıdı. Həmin il titul uğrunda görüşdə Novak Cokoviçlə Endi Marrey qarşılaşmışdı ki, həm serbin, həm də britaniyalının 23 yaşı var idi. Sisipas “Australian Open”də ilk, “Böyük dəbilqə” turnirlərində isə 2-ci dəfə finala çıxdı. O, 2021-ci ildə keçirilən “Rolan Qarros”un final görüşündə ilk iki setdə Cokoviçə qalib gəlsə də, davamını gətirə bilməmişdi.

Və bu il də bizi Cokoviç – Sisipas finalı gözləyir. Serb ulduz yarımfinalda amerikalı Tommi Pola heç bir şans vermədi. Cokoviç yalnız ilk setdə müəyyən müqavimətlə üzləşdi.