“Qalatasaray” ən problemli mövqeyi sayılan müdafiənin sol cinahına hələ də yeni oyunçu ala bilməyib.

Football-plus.az xəbər verir ki, “Sivasspor”lu Uğur Çiftçi ilə anlaşma əldə olunsa da, müxtəlif səbəblər üzündən onun keçidini bitirmək alınmır. Bu üzdən “Aslan” diqqətini başqa ismə - sabiq futbolçusu Aleks Tellesə yönəldib. Düzdü, legioner limiti üzündən Okan Buruk həmin mövqeyə əsasən yerli oyunçu transfer edilməsini istəyir. Amma Tellesin səviyyəsini nəzərə alsaq, onun gəlişinə heç kim “yox” deməz.

Müqavilə ilə “Mançester Yunayted”ə məxsus olan braziliyalı hazırda icarə əsasında çox bərbad mövsüm keçirən “Sevilya”da çıxış edir. “Sambaçı” Andalusiya klubunda əsas heyət üzvü sayılmır və bu mövsüm meydana çıxdığı 19 oyunun yalnız 11-də ilk “11-lik”də oynayıb.

Maddi detallar açıqlanmasa da, “Qalatasaray” bu futbolçunu 6 aylığa icarəyə götürmək istəyir. 30 yaşlı futbolçu daha öncə 2013-15-ci illərdə istanbulluların şərəfini qoruyub.