Kriştiano Ronaldo hələ ki yeni klubunda rəsmi oyunda qol hesabını aça bilməyib. O, “Əl-Nəssr”in formasında keçirdiyi ikinci rəsmi matçda ilk məğlubiyyətin acısını yaşayıb.

Bu klubda rəsmi debütü Səudiyyə Ərəbistanı çempionatının yanvarın 22-də keçirilən “Əl-İttifaq”la oyununa təsadüf edən məşhur portuqaliyalı futbolçu 1:0 hesablı qələbəyə sevinmişdi. Ər-Riyad klubu ölkə superkuboku uğrunda yarımfinal oyununda uğursuz nəticə göstərib. Paytaxt komandası bu mərhələdə “Əl-İttihad”a 1:3 hesabı ilə məğlub olub. “Əl-İttihad” finalda “Əl-Feyha” ilə qarşılaşacaq.

Superkubok matçında meydana start heyətində daxil olan və sonadək mübarizə aparan Ronaldonun arzuolunmaz vəziyyətə düşdüyünü də qeyd edək. O, az qala topa hər toxunuş edərkən və “Əl-İttihad”ın azarkeşlərinin olduğu tribunaya yaxınlaşarkən onların “Messi, Messi” şüarı ilə qarşılaşıb. Kriştianonun komandası növbəti oyununu çempionatda fevralın 3-də “Əl-Fateh”ə qarşı keçirəcək.

Yeri gəlmişkən, klubu Kriştianoya saat hədiyyə edib. Saat “Jacob & Co” markasına məxsusdu. Ağ qızıldan hazırlanmış və sırf 37 yaşlı Ronaldo üçün istehsal edilən saatda 389 ədəd nadir qiymətli daş var. Bu hədiyyənin dəyəri isə 630 min funt sterlinqdi.