Portuqaliya yığmasının dünya çempionatında mübarizəni dayandırmasından sonra bir neçə gün Qətərdə qalan Kriştiano Ronaldo artıq İspaniyadadı. Özü də “Real”ın təlim-məşq bazasında məşq edir.

Bu xəbəri relevo.com portalı yayıb. Məlumatda 37 yaşlı hücumçunun Madrid klubunun əsas komandasının Valdebebasda məşq etdiyi meydanda yox, kompleksin meydançalarından birində formasını qorumağa çalışdığı bildirilib. Hazırda azad agent statusunu daşıyan ulduz futbolçu noyabrda “Mançester Yunayted”lə müqaviləsini qarşılıqlı razılıq əsasında pozmuşdu. Ronaldonun “Real”da 2009-18-ci illərdə oynadığını da yada salaq.

Yeri gəlmişkən, Kriştiano ilə meneceri Jorje Mendeş arasındakı münasibətlər bir qədər gərginləşib. “As” qəzetinin məlumatına görə, gərginliyə futbolçunun gələcəyi ilə bağlı qeyri-müəyyənlik səbəb olub. Ponaldonu agentindən narazı salan məsələ ötən aydan azad agent kimi qalmasıdı. O, yanvarın 1-dən yeni komandaya qoşula bilər. Amma problem ondadı ki, heç bir klubla müqavilə bağlamayıb. Ulduz futbolçu yüksək maaş tələb etdiyi üçün Avropa klubları onunla müqavilə bağlamaqda tərəddüd edirlər. Mendeş belə vəziyyətdə alternativ variantlar axtarsa da, hələ ki çıxış yolunu tapa bilmir.

Xəbərdə Ronaldo ilə Mendeşin münasibətlərində belə məqamların artıq bir neçə dəfə baş verdiyi də qeyd olunur. Portuqaliyalı menecerlə futbolçu bir-biri ilə az qala ata və oğul kimi davranırlar. Buna görə də indiyədək hansısa məsələdə ortaya çıxan fikir ayrılıqlarını qısa zamanda həll edə biliblər.

Xəbər verdiyimiz kimi, Ronaldo üçün yeganə transfer təklifi Səudiyyə Ərəbistanından gəlib. Futbolçunun “Əl-Nəsr”ə keçidi reallaşacağı halda illik qazancının 200 milyon avro olacağı iddia edilir. Bəzi mənbələrdə hətta tərəflərin 2,5 illik müqavilə üzrə razılaşdığı qeyd olunur. Kriştianonun bundan sonrakı karyerasında PSJ-nin sabiq idman direktoru Anter Enrike mühüm rol oynaya bilər. O, indi Qətər çempionatının yüksək liqasının rəhbəridi. Yerli mənbələr Enrikenin Ronaldonun bu ölkənin klublarından birinə keçidini təmin edə biləcəyini istisna etmir. Bu yerdə səbəbkarın adının “İnter Mayami”, “Los Anceles Qalaksi”, “Los Anceles”, “Sportinq” və “Əl-Hilal”la hallandığını da xatırladaq.