Rəşad Sadıqov: "Özümə uyğun tələblərim, xasiyyətim var"
Misli premyer-liqasının 19-cu turunun oyunları keçirilir.
"Zirə" "Sumqayıt"ı qonaq edib - 3:1. Matçdan sonra meydan sahiblərinin baş məşqçisi Rəşad Sadıqovun mətbuat konfransı keçirilib. Sizi mütəxəssisin fikirləri ilə tanış edirik:
"2023-cü ildə ilk oyun idi. Hər iki komandanın oyunçuları üçün fasilədən sonra başlamaq çətindi. İlk yarıda bunu hiss edirdik. Gözlənilməz qol buraxdıq. Halbuki rəqibin bu gedişatı üzərində işləmişdik. Amma ideal ötürmə və ideal qol oldu. Futbolçularım oyundan qopmadılar. İlk yarıda bir çox şeylər alınmırdı. Amma ruhdan düşmədik. Böyük əzmkarlıq göstərib, bizim üçün vacib üç xal qazandıq. Görəcək işimiz çoxdu. Hamımız bunu başa düşürük. Futbolçularımı təbrik edirəm. Növbəti oyuna köklənməliyik".
- Fərqli hissələr izlədik. Antalya toplanışında komanda tam komplektləşib?
- Toplanışdan əvvəl də, oyunlarda müəyyən problemlər olurdu. İçimizdə bunu bilirik və üzərində işləyirik. İlk yarıda xüsusi narazı salan məqam yox idi. Hücumda daha kəsərli oynaya bilərdik. Amma bəzi anlarda futbolçular kəsərli ötürmələrə az üstünlük verirdi. İkinci yarıda daha yüksək motivasiya ilə oynadıq, daha böyük qüvvə ilə hücum etdik.
- Nemanya Andelkoviçlə nəyə görə yollarınızı ayırdız?
- Futbolçu vaxtında da belə olmuşam. Özümə uyğun tələblərim, xasiyyətim var. Müəyyən şeylər var ki, onlar olmamalıdı. Onlar olanda böyük uğurlardan danışa bilmərik. Andelkoviçlə danışdıq, mövqeyimizi bildirdik, normal şəkildə yollarımızı ayırdıq. Tərəfdarıyam ki, məşqçi ilə futbolçu arasında anlaşılmazlıq varsa, düzəlmirsə, yollar ayrılmalıdı. Detallara getmək istəmirəm. Xarakterindən də razı olmuşam. Müəyyən detallarda anlaşa bilmədik. Belə qərarlar məndə tez-tez olacaq. Futbolçu qarşısına böyük hədəf qoymalıdı. Olmayacaqsa, hər oyunda ürəyini qoymayacaqsa, nəticələri düşünməyəcəksə, yollarımızı ayıracaq.
- Ahmed Ayzaya “Kəpəz”də yaxşı oynayır. Onu buraxmağınıza peşman deyilsiz?
- Bir çox futbolçular var ki, özünü yaxşı tərəfdən göstərib. Bizə də təklif edilib. Futbolun içində olan şeylərdi. Onu çox bəyənirdim. Müəyyən şeylər var idi ki... ”Qarabağ”da, Qurban Qurbanovdan müəyyən şeylər var ki, uğur qazanmaq üçün vacibdi. Bu, gözə görünmür. Stabil və uğur qazanmaqdan ötrü müəyyən detallar olmalıdı. Olmazsa, qazanacağın uğur müvəqqəti olmayacaq. Mən isə müvəqqəti iş görmək istəmirəm. Böyük, yaxşı komanda formalaşdırmaq istəyirik.
- Fasilə dönəmində istədiyinizi edə bildiz?
- Çox səmərəli oldu toplanışımız. Əvvəlki illərlə müqayisədə daha çox razı qaldım. Keyfiyyəli oyunçular təklif edildi. Müəyyənləri ilə müqavilə imzalaya bilmədik. Yolda olan var. Digər tərəfdən komanda üçün səmərəli toplanış alındı. Futbolçular məsuliyyətli idi. Ümid edirəm ki, ikinci dövrədə faydasını görəcəyik.
Digər xəbərlər
