Premyer-liqanın 19-cu turunda "Kəpəz" "Qəbələ" ilə heç-heçə edib.

Football-plus.az xəbər verir ki, görüşdən sonra meydan sahiblərinin baş məşqçisi Tərlan Əhmədov qarşılaşma haqda fikirlərini səsləndirib:

"Fasilədən sonra çempionatdakı ilk matçın ağır keçəcəyini bilirdim. Dörd əsas futbolçumuz yox idi. Bu, bizim üçün problem idi. İkinci yarıda komanda hesabı qorumağa çalışdı, amma tapşırıq tamam başqa idi. Səhvlərin hesabına öndə olduğumuz oyunu əldən verdik. Buna baxmayaraq, 1 xal qazandıq. Nəticəni ədalətli hesab edirəm. 6-7-ci yer uğrunda mübarizə aparmağı qarşımıza məqsəd qoymuşuq. Birinci dövrədən daha çox xal qazana bilərik. Yeni komandadan çox şey tələb etmək olmur. Cavan oyunçularımız var. Komandada həyəcan olduğu hiss edilir. İndi də də bu problemi yaşadıq. Komanda daha əvvəlki görüşlərdə vacib xallar itirməsəydi, başqa pillədə ola bilərdik. "Kəpəz" azarkeşləri hər zaman uğur tələb edirlər".

Baş məşqçi xorvatiyalı qapıçı Mario Mustapiçin çıxışı haqqında da danışıb: "O, Antalyadakı toplanışda özünü yüksək səviyyədə göstərdi. Orxan Sadıqlı ağır xəstəlik keçirdiyi üçün hazırlıq prosesinə qatılmamışdı. Buna görə öz formasından uzaqdı. Xəstəlikdən sonra əvəzedici heyətlə məşq edib. Orxanın oyun praktikası hazırda azdı".

Mütəxəssis iki mövqeyə transfer istədiklərini sözlərinə əlavə edib: "Amma bizim büdcəmiz buna uyğun deyil. Düşünürəm ki, bu məsələ artıq bağlanıb".