Antalyadakı təlim-məşq toplanışını başa vuran “Səbail” iki gün öncə vətənə dönüb. Komanda bu müddət ərzində üç yoxlama oyununda da gücünü sınadı.

Polşa təmsilçisi “Legiya” ilə matçda bərabərlik qeydə alındı - 2:2. Çexiya “Bohemians 1905”i ilə qarşılaşmada qalib müəyyənləşmədisə (0:0), son sınaqda Serbiya “Spartak”ı “dənizçilər”i 1:0 hesabıyla məğlub etdi. Onu da qeyd edək ki, “Səbail” premyer-liqanın ilk yarısını 10 xalla sonuncu pillədə başa vurub. Baş məşqçi Şahin Diniyev təlim-məşq toplanışı ərəfəsində heyətdə dəyişiklik etdi. Bir neçə futbolçu komandadan göndərilsə də, gələnlər də oldu. Bunlardan birincisi “Şamaxı”da icarədə olan Adil Nağıyev idi. Futbolçu mövsümün ikinci yarısında müqavilə ilə məxsus olduğu klubun formasını geyəcək. Son günlərdə isə komanda daha bir futbolçunu – hücumçu David Qomisi “rənglərinə bağladı”. Onunla birillik müqavilə bağlanıb.

Maraqlıdı, Şahin Diniyevin komandaya gəlişi nəyi dəyişdi? “Səbail” çempionatın ikinci hissəsində düşdüyü böhrandan çıxa biləcəkmi? Bu və digər suallar ətrafında dünən onunla söhbətləşdik.

- Öncə təlim-məşq toplanışını dəyərləndirməyinizi istərdik. Komandadan, hazırlıq prosesindən razı qaldız?
- Ümumiyyətlə, təlim-məşq toplanışı çox yaxşı şəraitdə baş tutdu. Bundan səmərəli istifadə edə bildik. Düşünürəm ki, 14 gün davam edən hazırlıq zamanı tam istədiyimiz olmasa da, buna yaxın nəticəni əldə edə bildik. İlk növbədə qarşımıza iki məqsəd qoymuşduq. Öncə ab-havanı qaydaya salmalı, psixoloji durumu yaxşılaşdırmalı və özünəinamı artırmalıydıq. İkinci məqsədimiz isə komandanın funksional hazırlığını yüksək səviyyəyə gətirmək idi ki, məncə, bunların hamısına nail olduq. 14 gün ərzində 20 məşq və 3 oyunun keçirilməsi yüklənmənin necə olduğunun bariz göstəricisidi.

- Bu prosesdə futbolçulardan razı qaldız? Tapşırıqlarınıza əməl edə bildilər?
- Bəli, onların hər birinə təşəkkür edirəm. Baxmayaraq ki, yorğunluq, prixoloji və fiziki yüklənmələr var idi. Lakin hər gün oyun olması şərti ilə iki dəfə məşq edirdik. Bayaq dediyim kimi, məqsədlərimizdən biri də fuksional hazırlığın yüksək səviyyəyə çatdırılması idi. Futbolçuların hər biri bunu yüksək səviyyədə etməyə çalışdılar və öhdəsindən layiqincə gəldilər. İlk məşqdən sona qədər həm məşqlərə, həm də oyunlara eyni həvəslə çıxdılar.

- Keçək transferlərə. Komandadan göndərilənlərin əvəzinə, sadəcə, iki futbolçu heyətə cəlb olundu...
- Bura gəldiyim ilk gündən demişdim ki, bu komandanın potensialına inanıram. Mövqelər üzrə çox transfer etmək fikrində deyildim. Düşünürdüm ki, bu heyətlə uğur qazanmaq olar. Hələ də bu fikrimin üstündəyəm. Ona görə ki, qışda transfer etmək çox çətindi. Yaxşı oyunçuların, demək olar ki, hər birinin komandası var. Üstəlik yeni futbolçular cəlb etmək bu baxımdan da problem yarada bilərdi ki, onları komandaya, çempionata uyğunlaşdırmaq üçün vaxt olmayacaqdı. Çünki çempionatın ikinci yarısı tez başlayır, yeni transferləri hazırlamaq üçün, demək olar ki, vaxt çox azdı. Ona görə risk etmək istəmədik. Bilirsiz ki, Adil Nağıyev komandaya dönüb. İkinci transferimiz olan David Qomis isə vingerdi. Onu da bir müddət izlədikdən sonra çətiniklə komandaya cəlb etdik. Səviyyəli çempionatdan, Fransanın ikinci liqa komandasından gəldi. Oyunlarına baxanda da hiss etdim ki, səviyyəsi var. Belə deyək, bir məşqdə və bir oyunda iştirak etdi. 15-20 dəqiqə oynadı və topa ilk toxunuşundan məlum oldu ki, komandanın sisteminə uyğun futbolçudu. Ümid edirəm ki, “Səbail”ə xeyir verəcək. Legioner seçimində istənilən halda yanlışlıqlar olur. Lakin maksimum dərəcədə bunu az etməyə çalışırıq.

- Komandada baş məşqçi dəyişikliyi, yəqin ki, futbolçulara təsirsiz ötüşməyib. Bu problemin necə, öhdəsindən gələ bildiz?
- Futbolçuların psixoloji durumu artıq tam fərqlidi. Bir-birinə inanırlar. Bütün tapşırıqlarımızı meydanda əllərindən gələn qədər yerinə yetirməyə çalışırlar. Bayaq da dediyim kimi, onlardan çox razıyam.

- “Səbail” çempionatda sonuncu pillədə qərarlaşıb. Komandanı bu çətin durumdan çıxarmaq nə dərəcədə realdı?
- Sonuncu yerdə olmağımız reallıqdı. Ancaq biz burdan uzaqlaşmağa çalışacağıq. Düşünürəm ki, komandam buna layiqdi.

- Bir neçə futbolçu təlim-məşq toplanışının gedişində xəstələnmişdi. Hazırda onların durumu necədi?
- Bəli, orda xəstəlik yayılmışdı. Hər gün 2-3 oyunçumuz virusa yoluxurdu. Bizim tibb presonala da təşəkkür edirəm. Həqiqətən də futbolçuların meydana tez dönmələri üçün əllərindən gələni etdilər. Bir zədəli futbolçumuz da var. Pyotr Stasyuk sıradan çıxıb. Təlim-məşq toplanışı çərçivəsində məni məyus edən məsələ ancaq budu. Stasyuk yüksək səviyyəli futbolçudu. Məşqlərdə də özünü yaxşı tərəfdən göstərirdi. Çox heyif ki, sıradan çıxdı. Həkimlərin səyi ilə, inanıram ki, qısa zamanda komandaya qoşulacaq. Dəqiq vaxtı bilmirəm. Bu gündən məşqlərə başlayırıq. Yəqin ki, onda Stasyukun durumu da dəqiq bilinəcək. Xəstəliyə yoluxanlar da yavaş-yavaş özlərinə gəlir. Bu xəstəlik səbəbindən immunitetin azalması futbolçuların səylə məşq etməsinə mane olurdu. Bəzi futbolçulara istirahət, bəzilərinə fərdi tapşırıqlar verirdim. Demək olar ki, bu 14 gün ərzində bir-bir bütün futbolçularımız bu xəstəliyə yoluxdu. Hazırda isə hər şey normaldı. Ağabala Ramazanovun da bir az narahatlığı var idi. O da bir neçə günə hazır olacaq.

ŞAİR ABDULLA