Yunis Hüseynov mayı gözləyir: “İşi qənaətbəxş olmayanlarla vidalaşacağıq”
Miloş Velebitin müqaviləsinin müddəti başa çatandan sonra AFFA-nın təşkil etdiyi “Elit məşq” layihəsinə rəhbərliyin Yunis Hüseynova tapşırıldığını ötən saylarımızın birində xəbər vermişdik.
Xatırladaq ki, layihə 10 region üzrə 16 şəhərdə keçirilir. Əsas məqsəd paytaxt və bölgələrdən istedadlı futbolçuları seçərək onları fərqli yaş qrupları üzrə millilər üçün yetişdirmək, ustalıq səviyyələrini artırmaqdı. Velebitin dönəmində ümumilikdə layihəyə 27 məşqçi, 8 nəzarətçi cəlb olunmuşdu. Bəs görəsən, Yunis bəyin təyinatından sonra layihə çərçivəsində hansı dəyişikliklər olub? Hüseynov hansı yeniliklərə imza atmağı planlaşdırır?
57 yaşlı mütəxəssis “Futbol+”ə açıqlamasımda bunları söylədi:
“Hələ ki heç bir dəyişiklik olmayıb. Layihə payızda olduğu kimi davam etdirilir. Ancaq bu o demək deyil ki, yeniliklər olmayacaq. Maydan sonra bəzi dəyişikliklər etməyi düşünürük. Hələ ki proseslərə nəzarət edirəm, kimin nə işlə məşğul olduğunu izləyirəm. Hazırda “Elit məşq” layihəsində istirahətdi. Fevraldan məşqlərə start veriləcək”.
Yunis bəy bizimlə söhbətdə layihəyə cəlb olunan məşqçilər barədə də söz açdı:
“Elit məşq” layihəsində çalışan məşqçilərlə müqavilə bağlanıb. Onlar maya kimi işlərini davam etdirəcək. Ondan sonra kadr məsələsinə yenidən baxılacaq. Geridə qalan müddətdə özünü doğruldan məşqçilərlə yeni anlaşma imzalanacaq. İşi qənaətbəxş olmayanlarla isə vidalaşacağıq”.
RƏŞAD
