A seriyasınının 18-ci turunda qeydə alınan nəticələrdən sonra iki baş məşqçi işini itirib.

Football-plus.az xəbər verir ki, hər iki istefaya uğursuz nəticə səbəb olub.

Evdə “Montsa”ya uduzan (2:3) “Kremoneze”nin çalışdırıcısı Massimiliano Alvini vəzifəsindən azad edilib. Son 4 oyunda xal qazana bilməyən komanda A seriyasında 7 xalla sonuncu – 20-ci yerdədi. Autsayderi çətin vəziyyətdən Davide Ballardini çıxarmağa çalışacaq. Son klubu olan “Cenoa”dan 2021-ci ildə ayrılan 59 yaşlı mütəxəssislə müddəti 2024-cü ilin yayına qədər nəzərdə tutulan müqavilə imzalanıb.

“Salernitana” rəhbərliyi isə Davide Nikola ilə yolları ayırıb. A seriyasının son turunda “Atalanta”ya 2:8 hesablı məğlubiyyət baş məşqçinin istefaya göndərilməsini qaçılmaz edib. “Salernitana” hazırda 18 xalla 16-cı yeri tutur. Komanda ötən ilin oktyabrından indiyə qədər qələbə qazana bilməyib. Nikola “Salernitana” 2022-ci ilin fevralından çalışdırırdı.