Canni İnfantino yenidən sorğu-suala tutulub.

Football-plus.az xəbər verir ki, FİFA-nın prezidenti yanvarın 10-da İsveçrə prokurorları tərəfindən cinayət işi üzrə istintaq çərçivəsində dindirilib.

Bu, İnfantinonun ikinci dindirilməsidi. Prosesdə birinci mərhələ 2022-ci ilin aprelində baş tutmuşdu. Prokurorluğun işçiləri onunla vəzifə səlahiyyətlərindən sui-istifadə etməsi ehtimalı ilə bağlı aparılan araşdırma çərçivəsində söhbət aparıblar. Bu ehtimala İnfantinonun İsveçrənin sabiq federal prokuroru Mihael Lauber arasında o, FİFA prezidenti seçildikdən sonra baş tutan üç görüş yol açıb. Görüşlər 2016 və 2017-ci illərdə keçirilib. 2020-ci ildə başlayan istintaqa görə, belə görüş ədalət mühakiməsinə maneə kimi dəyərləndirilir. Çünki Lauber 2015-19-cu illərdə FİFA-da korrupsiya ilə bağlı araşdırmaya rəhbərlik edib. Xatırladaq ki, araşdırma başlayandan sonra İnfantinonun sələfi Yozef Blatter vəzifəsini tərk etməli olmuşdu.


Yerli mənbələrə görə, İsveçrə prokurorları Ulrix Veder və Hans Maurer əməliyyat fəaliyyəti çərçivəsində İnfantino ilə növbəti görüşləri istisna etmirlər. 52 yaşlı funksioner isə dindirilmə prosesinin martın 16-na qədər sona çatacağına ümid edir. Həmin gün FİFA-nın növbəti konqresində yeni prezident seçkisi keçiriləcək. İnfantino yeganə namizəd kimi postunu qorumağa çalışacaq.