Blatter: “İnfantino yalnız məni deyil, həm də mənim FİFA üçün gördüyüm işləri məhv etmək istəyir”
İsveçrə Federal Məhkəməsi Yozef Blatterin aqibətini iyulun 8-də müəyyən edəcək.
"Football-plus.az" xəbər verir ki, FİFA-nın sabiq prezidenti bu təşkilatdakı fəaliyyəti zamanı korrupsiya ilə bağlı ittihamlara görə məsuliyyətə cəlb oluna bilər.
Ali futbol qurumuna 1998-2015-ci illərdə rəhbərlik etmiş isveçrəli heç bir cinayət əməlinin olmadığını bildirib:
“Şərəfimi qorumaq istəyirəm. Mən FİFA-ya gələndə heç nə yox idi. Mən gedəndə isə FİFA iqtisadi, sosial və mədəni, hətta siyasi planda sanballı beynəlxalq təşkilat sayılırdı. İnfantinonun (ali futbol qurumunun hazırkı prezidentini nəzərdə tutur – red.) mənə qarşı nə üçün nankorluq etdiyini bilmirəm. O, hətta mənə qarşı süni şəkildə cinayət işinin açılmasına çalışır. İnfantino yalnız məni deyil, həm də mənim FİFA üçün gördüyüm işləri məhv etmək istəyir. Ona görə ki, mənimlə müqayisədə işlərinin öhdəsindən daha yaxşı gəldiyini düşünür. Buna görə çox həyəcanlandığımı deməliyəm. Məni cinayətkarlıqda, talançılıqda ittiham edirlər. Amma bu absurddu. Məhkəmə qarşısına niyə çıxdığımı bilmirəm. Əminəm ki, milyonlarla olmasa da, minlərlə futbolçu da bunun səbəbindən bixəbərdi. Mən qisasçı deyiləm, amma bəraət almaq istəyirəm. Məsələ mənim imicim və qurduğum futbolla bağlıdı. Mən bu futbolu təkbaşına yox, iki milyarddan çox pərəstişkarı olan müasir oyuna töhfə verən yüzlərlə məşqçi ilə birlikdə qurmuşam. Heç bir digər idman növü bu qədər populyar deyil”.
Digər xəbərlər
