“Turan Tovuz” da digər elita təmsilçiləri kimi təlim-məşq toplanışı üçün Antalyaya yollanacaq.

“Boz qurdlar” yanvarın 7-si səhər saatlarında qardaş ölkəyə yollanacaqlar. Ancaq hələ ki, Ayxan Abbasovun çalışdırdığı komanda “Dalğa Arena”da məşq edir.

Tovuz təmsilçisinə yaxın mənbələrdən “Football-plus.az” saytına daxil olan məlumata görə, fasilə zamanı komandaya yeni legionerlərin qoşulacağı gözlənilir. Mənbəmizin sözlərinə inansaq, Ayxan bəy Ruminiyadan olan sol cinah müdafiəçisinin xidmətində maraqlıdı. Türkiyə hazırlığı zamanı rumınla yanaşı, gürcü futbolçunun da düşərgəyə gələcəyi gözlənilir.

Xatırladaq ki, “boz qurdlar” Antalyadakı hazırlıq çərçivəsində 3 yoxlama oyunu keçirməyi planlaşdırır. Yanvarın 9-da tovuzlular Rumıniya “Petrolul”u ilə qarşılaşacaq. Yanvar 13-də isə baş məşqçi Ayxan Abbasov İsveçrə “Aarau”su ilə oyunda komandanı sınaqdan keçirəcək. Antalya təlim-məşq toplanışında son oyun isə yanvarın 17-də Polşa “Qurnik“inə (Zabrje) qarşı olacaq. Komanda yanvarın 18-də hazırlığı başa vuraraq vətənə dönəcək.

RƏŞAD