Premyer-liqanın 13-cü tur çərçivəsində dünən “Sumqayıt” öz meydanında “Neftçi” ilə bərabərə qalsa da, bu “kimyaçılar”ın turnir cədvəlindəki mövqeyinə təsir etməyib.

“Ağ-qaralar”la oyundan sonra “gənclik şəhəri”nin təmsilçisinin məşqçilər korpusunu sevindirən yeganə məqam komandanın 90 dəqiqədə 2 qol vurmasıdı. Xatırladaq ki, sumqayıtlılar 12 turdan sonra rəqib qapılarından cəmi 2 top keçirmişdi ki, bu da premyer-liqa klubları arasında ən pis göstəricidi.

Məşqçilər korpusundan söz düşmüşkən, Samir Abasov deyəsən islahatlara köməkçilərindən başlayıb. Belə ki, baş məşqçi qış fasiləsini gözləmədən köməkçilərindən biri ilə yolları ayırıb. “Football-plus.az” saytına kluba yaxın mənbədən daxil olan məlumata görə, Aleksey Baqanın mövsümlərarası fasilədə “Sumqayıt”a dəvət etdiyi serbiyalı fiziki hazırlıq üzrə məşqçi Qoran Başiçin işi Abasovu razı salmadığından 44 yaşlı mütəxəssis rəhbərlikdən onun yola salınmasını istəyib. Rəsmilər də baş məşqçinin istəyinə uyğun addım atıblar. Hazırda Abasovun məçşqçilər korpusunda fiziki hazırlıq üzrə məşqçi postu boşdu. Serbiyalının kimin əvəzləyəcəyi hələ ki, müəyyənləşməyib.

RƏŞAD