Lüis Hemiltonun “Mersedes”lə müqaviləsinin müddəti 2023-cü ilin sonunda bitəcək.

Yeddiqat dünya çempionu son müsahibəsində komanda ilə müqavilə müddətini artırmaq niyyətini çatdırıb, eləcə də karyerasını bitirənə qədər daha bir titul qazanmaq arzusunda olduğunu bildirib.

- Lüis, karyeranızda ilk dəfə mövsümü qələbəsiz bitirdiz. Bu məqam növbəti mövsüm ərəfəsində sizə əlavə motivasiya verəcəkmi?
- Belə nəticənin məni motivasiyasız qoymadığını dəqiq deyə bilərəm. Əminəm ki, əvvəllər də qələbəsiz mövsümüm olub. Məncə, 2001-də kartinqdə də qələbə qazanmamışdım.

- Onun üzərindən görün neçə il keçib!
- Aydın məsələdi ki, son mövsümdə titul uğrunda mübarizə aparmaq istəyirdik, ancaq ilin əvvəlində sərt reallıqla üzləşdik. Bəzi nəticələr bizə qələbə kimi göründü, ancaq belə deyildi.

- Nəyi nəzərdə tutursuz?
- Ötən il o qədər qələbəmiz olmuşdu ki, artıq adi hal kimi görünürdü. Bu isə çox qəribədi. Axı qələbə möhtəşəmdi! Bu il isə aza qane olduq. Hansısa mərhələlərdə 5-ci yer uğrunda mübarizə aparmağımıza sevinirdik, dördüncü olanda isə az qala sevincdən bayılırdıq. 4-cü və ya 5-ci yerlə kifayətlənmək yaxşı təcrübədi. Bizə yenidən mübarizə əzmini qaytarmaq lazım idi. Bu mənada hədəfimizə çatdıq.

- Başqa sözlə desək, uğursuzluqlar uğurları yüksək dəyərləndirməyə yardım edir?
- Bəli, mən indi uğurlarımı daha yüksək dəyərləndirirəm. Corc Rassellin qalib olduğu, mənim isə finişə ikinci çatdığım Braziliya mərhələsindən sonra komandamızın işindən qeyri-adi dərəcədə razı idim. Mövsümün gedişində maşını daha yaxşı anlamağa başladıq, bütün komanda üzvləri sözləşibmiş kimi yaxşı çalışdı. Bu il məni heç də tam məyus etmədi.

- Gələn il nəticələrin daha yaxşı olacağına ümid edirsiz?
- Zirvədə qalmağın necə çətin olduğunu bilirəm, ancaq biz ora qayıtmaq istəyirik. Mövsümün sonluğu bizi ümidləndirdi. Son bir neçə yarış müsbət dinamikanı göstərdi və subut etdi ki, lazımi inadkarlıqla hər şeyə nail ola bilərik.

- 8-ci titul haqda düşünürsüzmü?
- İndi yox. İndi bizdə Milad tətilidi, bacımın uşaqları ilə bayramı yaşayırıq.

- Yaxınlarda demişdiz ki, “Mersedes”lə müqavilənin müddətini artırmaq istəyirəm. Artıq komanda ilə danışıq aparıbsızmı?
- Hələ danışıqlara başlamamışıq. Ona görə ki, son iki ayımız yollarda keçib, danışmaq üçün, sadəcə, vaxt olmayıb.

- Uzunmüddətli müqaviləyə bel bağlayırsız?
- Bəzən səhər yuxudan ayılır və anlayırsan ki, daha əvvəlki işlə məşğul olmaq istəmirəm. Bəzən isə oyanır və düşünürsən ki, həyatım boyunca eyni işlə məşğul olmaq və daha artığına nail olmaq istəyirəm. Düşünmürəm ki, yeni müqaviləm uzunmüddətli olacaq, ancaq qalacağımı deyə bilərəm.

- Bir çox pilot “Formula-1”dən karyerasının zirvəsi çoxdan arxada qalandan sonra uzaqlaşıb. Elə Sebastyan Fetteldə də belə oldu. Siz çempion kimi getmək istəyirsiz?
- Düşünürəm ki, titul qazanandan dərhal sonra karyeranı bitirmək istənilən idmançının, eləcə də mənim arzumdu.

- Fettel üçün elə an yetişdi ki, avtoidman həyatının mənası olmaqdan uzaqlaşdı. Sizdə də vəziyyət belədi?
- Mənim üçün də avtoidman hər şeydən vacib deyil. Uşaq olanda və “Formula-1” dünyasına qədəm qoyanda belə idi, ancaq indi vəziyyət fərqlidi. 30 yaşa çatandan sonra anladım ki, dostlar, ailə, mənə əziz adamlar ilə keçirdiyim vaxtların xatirələri əzizdi. Buna köklənmişəm və belə anlar yaşamağı planlaşdırıram. Bizə qalan xatirələr olur.