Terim: “Maraqlı layihə olsa, qəbul edə bilərəm”
İşsiz günləri davam edən və ən son həyat yoldaşı ilə birlikdə xüsusi qonaq qismində dəvət olunduğu Qətərdə dünya çempionatının həlledici oyunlarını izləyərək Türkiyəyə qayıdan Fatih Terim tanınmış italiyalı jurnalist Canluka Di Marsioya açıqlamalar verib.
Football-plus.az xəbər verir ki, ''İmperator'' son mundialdan, fanatı olduğu Lionel Messidən və gözəl tanıdığı İtaliya futbolundan danışıb. Xatırladaq ki, ünlü mütəxəssis 2000-ci illərin əvvəllərində İtaliyada ''Fiorentina'' və ''Milan''ı çalışdırıb:
''Qətərdə Messidə Maradonavari şeylər gördüm. Təxminən 3 ay əvvəl verdiyim bir müsahibədə mənim üçün tarixin ən güclü futbolçularının adlarını sadalamışdım. Həmin vaxt Messi, Ronaldo, Maradona və Pelenin adını çəkmişdim. Bu 4 isim arasında sıralama müəyyənləşdirməli olsam, birə də, ikiyə də, üçə də Messini, sonra isə başqalarını qoyaram! Maradona mükəmməl oyunçu idi. Ronaldo da çox güclüdü. Amma Messi tam başqa aləmdi. Meydanda edə bilmədiyi şey yoxdu. Onu həqiqətən də çox sevirəm. Türkiyədə yaxşı italiyalı məşqçilər çalışır. Onların arasında Montella xüsusi seçilir. “Adana Dəmirspor”un başında hələ adından çox söz etdirəcək. Pirlo ilə Fariolini də bəyənirəm. Spallettinin ''Napoli''sinin builki çıxışı məni sevindirir. Onunla çox gözəl münasibətlərim var. Bir-birimizə hörmət edirik. Ümid edirəm ki, ''Napoli'' bu tempdə də davam edərək A seriyasının qalibi olacaq. Düzdü, Florensiya mənim ikinci evimdi. ''Milan''da da çalışmışam. Amma bu il məhz ''Napoli''ni dəstəkləyirəm. Çempionlar Liqasında İtaliyanın üç klubunun mübarizəni davam etdirməsi də məni ayrıca sevindirir. Bildiyiniz kimi, final İstanbulda olacaq. Onlardan birini, xüsusilə də Spalletti və ''Napoli''ni finalda izləyəcəyimizə inanıram. İtaliyadan yaxşı təklif gəlsə və ən əsası maraqlı layihə olsa, qəbul edə bilərəm. Çünki başqa şeylər diqqətimi cəlb etmir''.
Digər xəbərlər
