Mövsümün əvvəlində "Turan Tovuz"a keçən oyunçulardan biri də Eltun Turabovdu. “Neftçi”ylə görüşdən sonra əlaqə saxladığımız 25 yaşlı müdafiəçiylə bir çox məsələlər haqda danışdıq.

- Premyer-liqa təcrübəsi olan və legioner həyatı yaşamış futbolçusan. Niyə məhz “Turan Tovuz”a keçdin, başqa təkliflər yox idi?
- Təkliflər var idi. "Turan Tovuz"u seçdim. Bu komandaya keçidimin əsas səbəblərindən biri Ayxan Abbasov oldu. Həm məşqçi, həm də insan kimi futbolçuya dəyər verən mütəxəssislərdəndi. Onun rəhbərliyi altında "Sumqayıt"da da çıxış etmişəm.

- Legioner həyatı yaşayan futbolçulardansan. "Bilis"də qalmağa və ya başqa Albaniya klununa keçməklə karyeranı davam etdirməyə nə mane oldu?
- Albaniyada pis mövsüm keçirmədim. Sonra orda pandemiya dövrü başladı, Azərbaycana qayıtdım. Bir qədər sonra "Bilis"lə müqaviləmin müddəti bitdi. Bakıda olduğum zaman "Sumqayıt"dan sərfəli təklif gəldiyindən geri dönmək istəmədim. Həmçinin "Bilis"dən də müqaviləni yeniləməklə bağlı təklif olmadı.

- Yenidən legioner həyatı yaşamağı düşünürsən?
- Hələ ki yox. Hazırda əsas hədəfim "Turan Tovuz"da möhkəmlənmək, özümü daha da inkişaf etdirməkdi. Gələcəkdə legioner həyatı yaşamağı düşünərəm. Yaxşı təklif gəlsə, niyə də olmasın?!

- Çoxları uzun müddət sonra elitaya qayıdan "Turan Tovuz"dan yaxşı çıxış gözləmirdi. Amma siz belələrini yanıltdız. Bunun sirri nədi?
- Uzun illərdən sonra Tovuz təmsilçisinin premyer-liqaya qayıtması sevidiricidi. Tovuz sakinləri futbolla nəfəs alır desək, yanılmarıq. Yerli azarkeşlərlə "Turan Tovuz" rəhbərliyi və futbolçular arasında möhkəm bağlar var. Belə vəhdət də yaxşı çıxış etməyimizdə böyük rol oynayır. Tovuzluların güclü dəstəyini və sevgisini hər an doğrultmaq üçün meydanda əzmkarlıq göstərib xal və xallar qazanmağa çalışırıq.

- "Neftçi"yə qarşı da əzmkar mübarizə apardız. Amma bəxt sanki sizdən üz döndərdi. Bu barədə nə deyərdin?
- Bütün oyunlara olduğu kimi, "Neftçi"yə qarşı da ciddi hazırlaşmısdıq. Qarşılaşmanın gərgin keçəcəyini əvəlcədən bilirdik. Matça yaxşı qoşulduq, qol vurmaq üçün şanslarımız oldu, yararlana bilmədik. Rəqib isə penaltidən yararlanıb qələbə qazandı. "Neftçi"yə qarşı çempionatdakı ən yaxşı oyunlarımızdan birini sərgilədiyimizi düşünürəm. Rəqibin nə adından, nə də gücündən çəkindik. Sadəcə, bəxtimiz gətirmədi, ən azı 1 xal qazanmağa layiq idik.

- Artıq 17 tur geridə qalıb. Komandanın çıxışı haqda nə deyə bilərsən?
- Bu mövsümdən elitada komanda sayı artmaqla yanaşı, mübarizlik də artıb. Hər tur həm gərgin, həm də maraqlı keçir. Yeni yaranan komanda olaraq çətin mübarizəyə qoşulmuşuq. Əsas məqsədimiz çalışdığımız qədər əzmkarlıq göstərməklə daha çox xallar qazanıb irəli getməkdi.

- Necə düşünürsən, "Qarabağ" yenə asan çempion olacaq?
- "Qarabağ"ın gücü hər kəsə bəllidi. Ağdam təmsilçisi həm Azərbaycanda, həm də Avropadakı çıxışıyla sözünü deyib. Çempionluğa gəlincə, bu haqda nəsə deməyim düz çıxmaz.

- Premyer-liqanın ilk yarısının son turunda səfərdə "Qəbələ" ilə qarşılaşacaqsız. "Qırmızı-qaralar" doğma meydanda çox inamlı çıxış edir. Səfərdə nəyə ümid edirsiz?
- Hər oyunda olduğu kimi, "Qəbələ"yə qarşı da əzmkar mübarizə aparacağıq.

- Qətərdə keçirilən dünya çempionatı sona yaxınlaşır. Fransa - Argentina cütündə çempionluğa hansı komanda yaxındı?
- Fransanın çempion olacağını düşünürəm.

ABDULLA İSMAYILOĞLU